Не на сметнік, а ў перапрацоўку

У апошні час нарыхтоўцы і збору другасных матэрыяльных рэсурсаў у нашай краіне надаецца вялікая ўвага. Тым не менш, значная частка адслужыўшых пластыкавых бутэлек, шклянога посуду, паперы вывозіцца на сметнікі і замест таго, каб паўторна выкарыстоўвацца, проста выкідваецца ці закопваецца ў зямлю. Такімі легкадумнымі дзеяннямі мы засмечваем навакольнае асяроддзе, шкодзім прыродзе.

У кожнай хатняй гаспадарцы з цягам часу назапашваецца пэўная колькасць непатрэбных газет, часопісаў, пластыкавых і шкляных вырабаў. Не спяшайцеся іх выкідваць. У Ганцавічах ёсць спецыяльныя прыёмныя пункты, куды можна здаць другасную сыравіну і атрымаць за яе грошы. Карысна як людзям, так і дзяржаве.

Даведка “СП”. У Ганцавічах другасныя матэрыяльныя рэсурсы можна здаць: у складзе другаснай сыравіны раённага спажыўтаварыства па вул. Пясочнай і ў раённай жыллёва-камунальнай гаспадарцы па вул. Кастрычніцкай, 76.

Дарэчы, спецыялістамі-эколагамі падлічана, што 100 кілаграмаў макулатуры выратоўваюць жыццё аднаму дрэву і пры яе перапрацоўцы з меншымі выдаткамі выпускаецца чыстая папера і кардон. А з былых пластыкавых бутэлек вырабляюцца новыя прыгожыя вёдры, тазікі, скрынкі і іншыя неабходныя хатнія рэчы.

Паперу, шкло, пластык прымае раённая жыллёва-камунальная гаспадарка, прычым як за грошы, так і ў лік пагашэння запазычанасці па камунальных паслугах. Акрамя таго, тут прымуць і старую неразабраную бытавую тэхніку. Пры здачы больш чым 50 кілаграмаў другаснай сыравіны выдзяляецца тэхніка для яе вывазу. А райспажыўтаварыства закупляе ў насельніцтва яшчэ лом чорных металаў і чыгун.

Пры здачы другаснай сыравіны можна ўмацаваць свой сямейны бюджэт. Так, за макулатуру вы атрымаеце 9 капеек за кілаграм, ПЭТ-бутэлькі — 10 капеек, чорны металалом — 20 капеек, чыгун — 25 капеек за кілаграм. Але галоўнае — не заробленыя грошы, а ўсведамленне таго, што здача і перапрацоўка другаснай сыравіны мае вялікае значэнне для развіцця краіны: мы павінны пакінуць нашчадкам не засмечаную і адміраючую тэрыторыю, а квітнеючую прыроду.

Вячаслаў БУРДЫКА.