«Новыя імёны Беларусі»: будуючы — ствараць

У мінулым годзе гэты конкурс выклікаў вялікі грамадскі рэзананс і стаў візітнай карткай культурнага руху Федэрацыі прафсаюзаў Беларусі. У агульнай колькасці яго ўдзельнікамі сталі больш за 4 тысячы маладых прадстаўнікоў самых розных працоўных калектываў. 20 самых талентавітых удзельнікаў выйшлі ў фінал. Кожнага з іх на працягу двух тыдняў вучылі быць артыстамі зоркі беларускай эстрады — Ірына Дарафеева, Юрый Саваш, Вольга Плотнікава, Генадзь Маркевіч, Вікторыя Алешка, дуэт Аляксандра і Канстанцін. З чэрвеня па кастрычнік фіналісты конкурсу разам з зоркамі правялі больш за 50 канцэртаў у розных гарадах Беларусі, і завяршылі Рэспубліканскую народна-патрыятычную акцыю Федэрацыі прафсаюзаў Беларусі “Мы — разам” яркім гала-канцэртам у Мінску. А таму, улічваючы размах і вынікі конкурсу, было прынята рашэнне зрабіць яго штогадовым.

Адна з галоўных асаблівасцей сёлетняга сезона — новы фармат. У конкурсе, як і раней, могуць прымаць удзел толькі члены прафсаюзаў. Пры гэтым у “Новых імёнаў Беларусі” ўжо няма абмежаванняў: ні ўзроставых, ні творчых, а сам конкурс будзе праводзіцца ў дзвюх намінацыях: “Сцэнічная творчасць” і “Выяўленчае і дэкаратыўна-прыкладное мастацтва”. Зараз у конкурсе ФПБ прагучаць не толькі імёны артыстаў, але і мастакоў, майстроў сваёй справы.

Конкурс пройдзе ў чатыры этапы: з лістапада 2015 года па май 2016. У лістападзе ён стартуе ў працоўных калектывах краіны. Раённыя (гарадскія) этапы пройдуць ў снежні — студзені, абласныя — у лютым — сакавіку. Рэспубліканскі этап, куды трапяць самыя таленавітыя ўдзельнікі, адбудзецца вясной, а імёны пераможцаў стануць вядомымі 1 мая, у Свята працы.

А ў нашым раёне пачынаецца адборачны этап для конкурсу. Ужо зараз усе матэрыялы, якія датычацца “Новых імён Беларусі”, раздадзены ў пярвічныя прафсаюзныя арганізацыі. Там рыхтуюцца ўдзельнікі раённага конкурсу, а 1 снежня ўжо будзе вядомы іх склад, яны выступяць на сцэне ГДК 18 снежня. Таму, пакуль не позна, мы запрашаем усіх жадаючых паўдзельнічаць у гэтым этапе.

Наталля КАНДРАТОВІЧ,

старшыня раённага

аб’яднання прафсаюзаў.