Амаль увесь экспарт прыпадае на краіны Еўрасаюза

Рост продажу тавараў за мяжу назіраецца па трох асноўных пазіцыях: драўніна — плюс 32 працэнты (2 мільёны 89 тысяч долараў — доля ў агульным аб’ёме 59 працэнтаў), пастаўкі прадуктаў расліннага паходжання (ягады) выраслі ў 3,5 раза да 1,1 мільёна долараў і займаюць 31 працэнт ад усяго экспарту. У параўнанні з мінулым годам на 3,5 працэнта павялічыўся продаж за мяжу і тэкстыльных вырабаў, іх рэалізавана на 233 тысячы долараў.

Варта акцэнтаваць увагу менавіта на нарыхтоўцы ягад. Сёлета яна вядзецца, улічваючы кан’юнктуру рынку, больш актыўна. І калі летась ягад з улікам журавін па раёне нарыхтавалі толькі 145 тон, дык сёлета ўжо амаль 400 тон.

Таксама прасоўвае на знешнія рынкі сваю прадукцыю ААТ “Модуль”. Заключаны кантракт на 1,7 мільёна долараў з расійскім прадпрыемствам і пачалася адгрузка тавару.

На экспарт галоўным чынам працуюць прыватныя прадпрыемствы, на якія прыпадае 94 працэнты паставак тавараў за мяжу. Прычым 86 працэнтаў аб’ёмаў экспарту прыходзіцца на краіны Еўрасаюза. Сярод асноўных партнёраў значацца фірмы з такіх краін, як: Германія, Польшча, Расійская Федэрацыя, Літва, Эстонія, Швецыя і Нідэрланды. Усяго ж экспарт ажыццяўляўся ў 13 краін свету.

Разам з гэтым у раёне назіраецца значнае зніжэнне аб’ёмаў экспарту паслуг. Іх аказана на 152,5 тысячы долараў, што складае 60,9 працэнта да ўзроўню мінулага года. І больш паловы ад паслуг, якія аказваюцца фірмам замежжа, прыпадае на транспартныя. Тут асноўнымі партнёрамі з’яўляліся арганізацыі Расіі і дэвальвацыя нацыянальнай валюты краіны-суседкі негатыўна паўплывала на попыт там беларускай прадукцыі. Адсюль і зніжэнне паказчыкаў.

У той жа час раённай жыллёва-камунальнай гаспадаркай атрымана ў пераразліку на валюту 59,2 тысячы долараў выручкі за прадастаўленне іншаземцам такой турпаслугі, як пражыванне ў гасцініцы. А гэта ў 4,5 раза больш, чым летась. Акрамя гэтага УАЗ “Ганцавіцкая ЦРБ” аказала паслуг замежным грамадзянам у галіне аховы здароўя на 3 тысячы долараў — на 36,4 працэнта больш мінулага года.

Падрыхтавана паводле

 інфармацыі аддзела

эканомікі райвыканкама.