“Нічыйная” канава ў Хатынічах

Справа ў тым, што канава зарасла лазой, кустамі і дрэвамі (НА ЗДЫМКУ), а некаторыя нядобрасумленныя грамадзяне нават скідваюць у яе смецце, што прычыняе многія нязручнасці, асабліва тым, праз чые двары праходзіць гэтая канава. “Мы некалькі разоў спрабавалі яе чысціць, высякалі лазу, спілоўвалі кустоўе, але ці наша гэта работа? Канава праходзіць уздоўж майго двара, амаль па ўсім перыметры, але мне здаецца, што чысткай гэтай тэрыторыі павінны займацца камунальнікі або іншыя службы. Хацелася б даведацца, хто на самай справе адказвае за чысціню і добраўпарадкаванне меліярацыйнай канавы, улічваючы тое, што яна праходзіць нават па тэрыторыі мясцовай школы. Зарослая і брудная, яна выглядае як мінімум неэстэтычна, а там жа вучацца нашы дзеці”, — расказвае адзін з жыхароў вуліцы Кастрычніцкай.

Па тлумачэнні і каментарыі мы звярнуліся да старшыні Хатыніцкага сельвыканкама Генадзя Перашчука: “У 80-я гады гэтая канава была пракапана па зваротах грамадзян нашым СВК, для асушэння тэрыторыі, бо ў тыя часы дамы жыхароў вёскі часта падтоплівала вада, а таму такі элемент асушальнай сістэмы быў проста неабходны. Апошнія 9 гадоў праблемы падтоплівання жылых дамоў не існуе, а таму і канава стала не патрэбная, па сутнасці. Але яна не знаходзіцца на балансе ніводнай арганізацыі, простай мовай кажучы, — нічыйная. А таму, на маю думку, грамадзяне, якія жывуць у непасрэднай блізкасці ад канавы, павінны самі “даглядаць” яе, пры неабходнасці пачысціць, высекчы лазу і гэтак далей. Напрыклад, участак, які праходзіць каля тэрыторыі школы, работнікі ўстановы сумесна са школьнікамі, добраўпарадкоўваюць сваімі сіламі. Тое ж самае я прапананую рабіць і іншым. Калі неабходна, я магу прыцягнуць на дапамогу лясніцтва, каб справіцца з дрэвамі і кустоўем, а ў астатнім я тут вялікай праблемы не бачу. А што датычыцца смецця… Прабачце, але ж людзі самі і ствараюць гэтую праблему, бо, згадзіцеся, калі не кідаць ў канаву смецце, яна і брудная не будзе”.

Тэкст і фота Ксеніі ЛУЦКО.