Абяцанага тры гады чакаюць?

У чацвер, 22 кастрычніка, у рэдакцыю раённай газеты звярнулася жыхарка вёскі Любашава Анжэла Паўлоўская. Жанчына ўсхвалявана расказала аб сваёй праблеме. Справа ў тым, што яны з мужам і траімі дзецьмі пражываюць у доме мясцовага сельгаскааператыва. Вясной гэтага года ў іх выйшаў са строю ацяпляльны кацёл. Па дапамогу ў рамонце сям’я звярнулася ў СГВК “Любашава”, старшыня якога паабяцаў, што кацёл у хуткім часе будзе дэманціраваны і адрамантаваны. Але час ішоў, а меры прыняты так і не былі. Вось што расказала Анжэла Паўлоўская: “Летам асаблівай неабходнасці ў карыстанні катлом не было. Паўмесяца назад, так і не дакачаўшыся прыезду майстроў, муж з дапамогай знаёмага сам зняў кацёл і адвёз яго на рамонтны двор гаспадаркі. І з таго часу справа не рухаецца: катла няма, ў хаце холадна і сыра, а на двары, між тым, восень. Да таго ж, у мяне трое дзяцей, самі разумееце, як патрэбен кацёл у такіх абставінах”.

Старшыня СВК, дарэчы,  абяцаў, што кацёл будзе пастаўлены яшчэ ў мінулую суботу, але, як бачым, абяцанні так і засталіся нявыкананымі.

Сам жа старшыня сельгаскааператыва Сяргей Зеньковіч, пракаменціраваў сітуацыю наступным чынам: “Так, мы два тыдні назад забралі на рамонт кацёл Паўлоўскіх. Мы нясём адказнасць за спраўнасць ацяпляльнага абсталявання ў дамах, якія знаходзяцца на балансе гаспадаркі. Але разумееце, у нас на сённяшні момант 4 аналагічныя няспраўныя катлы, якія трэба адрамантаваць. Тэрмін эксплуатацыі абсталявання — 7 гадоў, а таму з часам паломкі здараюцца ўсё часцей. Купіць людзям новыя катлы мы не можам: проста не маем матэрыяльных сродкаў, бо новы на каштуе 12 мільёнаў, калі браць адразу з завода, а ў магазіне — 16.

Варта сказаць, што і рамантаваць ацяпляльныя прыборы не так проста. Матэрыялаў няма (мы іх вельмі доўга шукалі, нават у іншых СВК), а майстры-зваршчыкі не згаджаюцца брацца за гэтую справу: работа карпатлівая і доўгая. Калі тлумачыць даступнай мовай, дык зламаны “агрэгат” неабходна разрэзаць, знайсці ўсе дзіркі, нават самыя малыя, і амаль поўнасцю пераварыць унутранае начынне катла. А потым, калі выконваць рамонт грунтоўна, варта яшчэ праверыць адрамантаваны кацёл пад ціскам на наяўнасць працечак. Таму два тыдні — гэта не такі вялікі тэрмін для рамонту, тым больш, што тэрмін выканання работы адносна менавіта катла Паўлоўскіх — да 22 кастрычніка, гэта значыць, да сённяшняга дня. А значыць, заўтра ён будзе ўжо ўстаноўлены”.

Падчас размовы, Сяргей Аляксандравіч адзначыў, што праблема выхаду са строю ацяпляльных катлоў існуе не толькі ў Любашаве. Многія СВК у раёне не маюць грашовых сродкаў, каб купіць новыя, а таму прыходзіцца “выкручвацца” па меры магчымасці. Таксама Сяргей Зеньковіч заўважыў, што і самі гаспадары, якія жывуць у такіх дамах, часта халатна адносяцца да маёмасці, маўляў, не маё — значыць, можна не берагчы. А берагчы варта, бо праблему лягчэй папярэдзіць, чым потым вырашаць.

Ксенія ЛУЦКО.