“Сацыяльнае таксі” заўсёды дапаможа

Вось ужо шосты год у ДУ “Тэрытарыяльны цэнтр сацыяльнага абслугоўвання насельніцтва” дзейнічае такая транспартная паслуга, як сацыяльнае таксі. За зусім невялікі кошт — 2400 рублёў за кіламетр — вас адвязуць у любую кропку не толькі нашага раёна, але і рэспублікі. Таксі груза-пасажырскае, а гэта значыць, што на ім можна перавезці і разнастайныя грузы.

Магчымасць скарыстацца гэтай паслугай маюць грамадзяне сацыяльна ўразлівых катэгорый: пажылыя людзі, пенсіянеры, інваліды, шматдзетныя, няпоўныя ці малазабяспечаныя сем’і і г.д. І яны з задавальненнем заказваюць таксі: па словах загадчыцы аддзялення неадкладнага сацыяльнага абслугоўвання Ірыны Кандратовіч, за мінулы перыяд гэтага года сацыяльнае таксі выканала больш за 230 заказаў.

— Да нас звяртаюцца фактычна штодзённа, звычайна два-тры разы на дзень, — расказала Ірына Мікалаеўна. — Кошт прымальны, аўтамабіль наш заўсёды чысты. Мы працуем па выкліках, а таксама дапамагаем на розных кірмашах. А пра вадзіцеля наогул можна доўга гаварыць. Нягледзячы на тое, што Уладзімір Яўсеня працуе ў нас нядаўна, крышку менш за год, ён змог стаць не толькі душой калектыву, але і незаменным памочнікам для нашых кліентаў. Ён спагадлівы і ўважлівы чалавек, робіць усё, аб чым яго просяць людзі: дапамагае пры пагрузцы, нават выносіць кліентаў, якія не могуць хадзіць, на руках. Яго хваляць, яму ўдзячныя.

Дарэчы, Уладзімір Канстанцінавіч зайшоў у кабінет якраз падчас нашай гутаркі. І сапраўды, нават на першы погляд здаўся незвычайным чалавекам: шчырая ўсмешка, добры настрой. З задавальненнем вадзіцель адказваў на пытанні.

— Я вельмі люблю працаваць з людзьмі. Мне падабаецца гутарыць з імі, дапамагаць. Пра тое, “ці пераношу я бабулек”, у мяне пытаюцца вельмі часта. А я што? А я пераношу! (смяецца). Калі чалавек сам не можа справіцца з чым-небудзь, яму трэба дапамагчы. Кожны з нас можа апынуцца ў такіх абставінах. Я, дарэчы, заўсёды жыў і буду жыць, прытрымліваючыся наступнага правіла: “Добрасумленна выконвай свае абавязкі, не бойся цяжкасцей і жыві спакойна”. А таму мяне не напалохаеш ніякай работай.

Пасля гутаркі з гэтымі прыемнымі людзьмі, задумалася: а сапраўды, яны прыносяць велізарную карысць людзям, якія не маюць магчымасці зрабіць нешта без дапамогі! І таму хацелася б звярнуць увагу на тое, што ў выпадку, калі вы не можаце з чымсьці справіцца самі, яны заўсёды гатовы дапамагчы. Заказаць сацыяльнае таксі можна па тэлефоне 6-40-44 ці непасрэдна ў ДУ “Тэрытарыяльны цэнтр сацыяльнага абслугоўвання насельніцтва” па адрасе: вуліца Матросава, 64б, кабінет нумар 3.

Аляксандра ГУРМАН.

НА ЗДЫМКАХ: загадчыца аддзялення неадкладнага сацыяльнага абслугоўвання Ірына Кандратовіч і вадзіцель сацыяльнага таксі Уладзімір Яўсеня. 

Фота аўтара

і з архіва ДУ “ТЦСАН”.