Разам супраць карупцыі

На мінулым тыдні адбылося пасяджэнне каардынацыйнай нарады па барацьбе са злачыннасцю і карупцыяй Ганцавіцкага раёна, на якой разглядалася пытанне аб выніках праверкі арганізацыі работы праваахоўных і кантралюючых органаў па прафілактыцы правапарушэнняў, барацьбе з карупцыяй і эканамічнай злачыннасцю ў раёне. 

Асноўныя моманты ўзнятай тэмы акрэсліў намеснік пракурора Брэсцкай вобласці Віктар Савіч, які прыняў непасрэдны ўдзел у пасяджэнні. Ён акцэнтаваў увагу на пэўных недахопах работы па прафілактыцы злачыннасці органаў выканаўчай улады, упушчэннях і недапрацоўках у гэтым пытанні з боку раённага аддзела ўнутраных спраў. Шмат ёсць пытанняў да супрацоўнікаў міліцыі і па выяўленні злачынстваў карупцыйнай накіраванасці — за апошні год імі не зафіксавана ніводнага факта. Усе крымінальныя справы па гэтым накірунку ініцыіраваліся праваахоўнымі структурамі абласнога ўзроўню.

Таксама Віктар Васільевіч закрануў праблемныя пытанні, звязаныя з эканамічнымі злачынствамі: ад гучнай справы па ўхіленні ад падаткаў ганцавіцкім прадпрымальнікам на мільярды рублёў (зараз ён знаходзіцца ў вышуку — заўвага аўт.) да заключэння дзяржаўнымі прадпрыемствамі кабальных дагавораў з прыватнымі фірмамі. У вобласці пачасціліся выпадкі, калі такім чынам прыватнікі ўпісваюць у дагавор за невыкананне абавязкаў другім бокам велізарныя штрафныя санкцыі, якія ў дзясяткі, а то і сотні разоў, могуць перавышаць суму кантракту. У выніку, па сутнасці, значныя бюджэтныя сродкі з-за бестурботнасці адказных асоб асядаюць у кішэнях прыватнікаў, якія іншы раз спецыяльна ўсё даводзяць да дэбіторскай запазычанасці, а потым спаганяюць свае грошы і налічаную пеню праз Эканамічны суд. Здаецца, усё ў рамках закона, але дзяржаве наносіцца істотны матэрыяльны ўрон і вінаватыя ў любым выпадку павінны яго кампенсаваць.

Пасля абмеркавання ўзнятых пытанняў, каардынацыйнай нарадай на чале з пракурорам раёна Сяргеем Насеней, у якую таксама ўваходзяць адказныя работнікі райвыканкама, райаддзела ўнутраных спраў, прынята рашэнне, у адпаведнасці з якім, органам выканаўчай улады даручана актывізаваць работу па прафілактыцы правапарушэнняў і кантролі за асобамі, якія вядуць асацыяльны лад жыцця. Райаддзелу ўнутраных спраў прадпісаны цэлы комплекс мерапрыемстваў па паляпшэнні прафілактычнай работы, у тым ліку забеспячэнні комплекснага падыходу і якаснага ўзаемадзеяння ўсіх службаў і падраздзяленняў аддзела пры ажыццяўленні дзейнасці па барацьбе з карупцыяй. Таксама ёсць шэраг даручэнняў і раённаму аддзелу Следчага камітэта па пытаннях узаемадзеяння з сумежнымі структурамі.

Дарэчы, акцэнт на цеснае і эфектыўнае ўзаемадзеянне паміж усімі зацікаўленымі службамі і сілавымі структурамі праходзіў чырвонай ніткай на працягу ўсёй нарады. Гэта і зразумела, толькі агульнымі намаганнямі магчыма рэальна працаваць на прадухіленне правапарушэнняў і злачынстваў. У гэтым і галоўны сэнс — у першую чаргу ліквідаваць прычыны і спрыяльныя ўмовы для іх здзяйснення, тады і парушэнняў закона будзе значна менш.