З 16 чэрвеня на Ганцаўшчыне будзе спынена вяшчанне тэлевізійных праграм у аналагавым стандарце, якое зараз вядзецца са Слоніма

Як паведаміў дырэктар Брэсцкага абластнога вузла радыёвяшчання і тэлебачання Віктар Караблёў, антэна, усталяваная на станцыі, пакуль знаходзіцца на часовай вышцы, а гэта значыць, што зона пакрыцця ў яе адносна малая — горад і невялікая тэрыторыя вакол яго. Таму ў жыхароў нашага раёна, у якіх на прыватных дамах ўстаноўлены вонкавыя антэны, могуць быць праблемы з прыёмам сігналу. Малюнак можа тармазіць, распадацца на часткі — быць няякасным. Але хвалявацца не варта. Жыхарам горада і прылягаючай тэрыторыі проста трэба накіраваць антэну ў бок паўднёвай часткі горада, дзе і размешчана станцыя, і дастаць з разеткі блок забеспячэння антэннага ўзмацняльніка.

Калі АРТПС запрацуе цалкам, цяперашнюю антэну трэба будзе замяніць на пасіўную антэну дэцыметровага дыяпазону альбо замяніць плату антэннага ўзмацняльніка, з чым можа справіцца наладчык.

Звяртаем вашу ўвагу на тое, што з 16 чэрвеня будзе спынена вяшчанне тэлевізійных праграм у аналагавым стандарце, якое зараз вядзецца са Слоніма. Тэлепраграмы СТВ, Беларусь — 1 і АНТ у тых, хто пакуль не перайшоў на выкарыстанне лічбавых прыставак, хутчэй за ўсё, знікнуць цалкам, таму што зона пакрыцця гэтых тэлеканалаў зараз — амаль увесь наш раён.

Зараз пры дапамозе лічбавай прыстаўкі бясплатна можна глядзець сацыяльны пакет тэлеканалаў. Але, калі Ганцавіцкая АРТПС запрацуе поўнасцю, можна будзе карыстацца паслугамі эфірнай ZALA, варта толькі заключыць дагавор з Ганцавіцкім раённым вузлом электрасувязі,   згодна з якім гледачам прапануюцца два пакеты тэлепраграм, кожны з якіх утрымлівае ў сабе 18 тэлеканалаў.

Дадатковую інфармацыю можна атрымаць па бясплатным нумары 172. Наконт набыцця прыставак па акцыі і па іншых пытаннях можна звяртацца па нумарах 2-20-06 і 2-30-20.  Тэлефанаваць трэба са стацыянарнага тэлефона. Спецыялісты адкажуць на любыя пытанні, вы атрымаеце кваліфікаваную дапамогу.

Уласн. інф.