Хатынаўцы — уладальнікі суперкубка

На Ганцаўшчыне на стадыёне СДЮШАР адбыўся старт чарговага футбольнага сезона. Прычым, упершыню ён пачаўся матчам за суперкубак раёна, у якім паміж сабой сустрэліся мінулагодні чэмпіён — каманда “Будаўнік — ПМК-14” і ўладальнікі кубка раёна — футбалісты каманды “Хатынічы”.

Перад стартавай гульнёй сезона многія прыхільнікі футбола аддавалі перавагу футбалістам “Будаўніка — ПМК-14”. Нягледзячы на тое, што ў складзе

чэмпіёнаў адсутнічала некалькі вядучых ігракоў, яны ўсё роўна лічыліся фаварытамі ў гульні за суперкубак.

З першых хвілін сустрэчы каманда “Будаўнік — ПМК-14” паспрабавала захапіць ініцыятыву. І ўжо на дзявятай хвіліне матча лік быў адкрыты: пасля адной з атак “будаўнікоў” Алег Свірыд прабіў па варотах, галкіпер “Хатыніч” выратаваў сваю каманду, але першым на дабіванні згуляў Аляксандр Харлаогійн, які і пераправіў мяч у вароты — 1:0.

Здавалася, што футбалісты “Будаўніка — ПМК-14” і надалей будуць кантраляваць гульню. У першай палове сустрэчы так яно і адбывалася: “будаўнікі” больш валодалі мячом і мелі яшчэ некалькі шанцаў, каб павялічыць сваю перавагу, аднак атакам мінулагодніх чэмпіёнаў не хапала дакладнасці ў завяршаючай стадыі. Былі выдатныя магчымасці і ў хатыніцкіх футбалістаў, але Вадзім Пічыц і Ігар Катовіч не здолелі рэалізаваць свае моманты, якія яны стварылі падчас адной з атак.

У другой палове сустрэчы малюнак гульні значна змяніўся. Замены і тактычныя перабудовы, якія адбыліся ў складзе каманды “Будаўнік — ПМК-14”, негатыўным чынам паўплывалі на гульню “будаўнікоў”. “Хатынічы”, у сваю чаргу, загулялі больш смела і ўпэўнена і праз некалькі хвілін пасля пачатку другога тайма зраўнялі лік: пасля розыгрышу штрафнога вызначыўся Ігар Кот.

Чэмпіёны раёна і фаварыты гульні за суперкубак паспрабавалі выправіць сітуацыю на сваю карысць, аднак футбалістаў з Хатыніч ужо было не спыніць. Літаральна на працягу некалькіх хвілін хатыніцкая каманда не толькі здолела выйсці наперад, але і павялічыла сваю перавагу. Спачатку бліскуча згуляў Арцём Ярашэвіч, які выйшаў на замену у другім тайме. Паўабаронца “Хатыніч” абыграў аднаго з ігракоў “Будаўніка — ПМК-14” і не пакінуў аніякіх шанцаў галкіперу “будаўнікоў” Антону Жукоўскаму. А праз некалькі хвілін пасля другога гола выхад сам-насам з варатаром ганцаўчан рэалізаваў Мікіта Пічыц, які забіў трэці гол хатыніцкай каманды.

Напрыканцы сустрэчы нападаючы “Хатыніч” Ігар Катовіч забіў і чацвёрты мяч у вароты “будаўнікоў”, пасля чаго стала зразумела, што суперкубак дастанецца менавіта ігракам з Хатыніч.

Футбалісты “Будаўніка — ПМК-14” імкнуліся выправіць сітуацыю на сваю карысць, але наперадзе ў іх практычна нічога не атрымлівалася. Магчыма, з-за гэтага ў некаторых выпадках ганцаўчане гулялі празмерна груба і, напрыклад, абаронца ганцаўчан Дзмітрый Лексакоў за ўдар саперніка нагой у адным з эпізодаў заслугоўваў як мінімум выдалення з поля, аднак атрымаў толькі жоўтую картку.

Фінальны свісток арбітра зафіксаваў упэўненую перамогу каманды “Хатынічы” з лікам 4:1.

Сустрэча за суперкубак атрымалася цікавай, эмацыянальнай і непрадказальнай. Хацелася б, каб і новы футбольны сезон на Ганцаўшчыне, які стартуе 6 чэрвеня, таксама прайшоў на высокім узроўні і падарыў гледачам і прыхільнікам футбола шмат станоўчых эмоцый.

Уладзімір САКАЛОЎ.

НА ЗДЫМКАХ: Вадзім Пічыц (злева) супраць Дзмітрыя Лексакова; каманда-пераможца. Злева направа — першы рад: Вадзім Пічыц, Аляксандр Канановіч, Сяргей Канановіч, Руслан Кісялевіч, Дзмітрый Сяргейчык, другі рад: Аляксей А. Канановіч, Арцём Ярашэвіч, Мікіта Пічыц, Ігар Катовіч, Дзмітрый Амрэйчык, Ігар Кот, Аляксей В. Канановіч, Віктар Ярашэвіч, Уладзіслаў Рабцэвіч.

Фота Міхася АРЭШКІ.