Удалае выступленне

Фестываль-конкурс праводзіцца ў тры этапы: першы этап з’яўляецца адборачным і праводзіцца ўстановамі адукацыі; на другім у арганізацыйны камітэт адпраўляецца дэманстрацыйны відэаролік, а трэці — з’яўляецца заключным і праводзіцца заснавальнікам фестывалю-конкурсу.

На працягу двух тыдняў будуць праслуханы ўсе ўдзельнікі ва ўсіх намінацыях і ў кожнай вызначаны дыпламанты, лаўрэаты і ўладальнікі Гран-пры. Прыемна адзначыць, што ўжо на пачатку конкурсных праслухоўванняў, 23 мая, сярод узнагароджаных ёсць і прадстаўнікі нашага горада: у намінацыі “ансамблевае выкананне” дыпломам 3 ступені ўзнагароджаны камерны ансамбль ДУА “Ганцавіцкая дзіцячая школа мастацтваў”. У склад гэтага ансамбля ўваходзяць вучаніцы 5 класа Дар’я Рылка (фартэпіяна), Паліна Уласень, Анастасія Піваварчук, Ангеліна Малышка (скрыпкі). Кіраўнік ансамбля, таленавіты выкладчык Ала Шэйко была адзначана дыпломам за высокае педагагічнае майстэрства і развіццё нацыянальных традыцый музычнага мастацтва Беларусі. Але і на гэтым выхаванкі Алы Васільеўны не спыніліся: Лізавета Піваварчук (узроставая катэгорыя А да 10 гадоў), Анастасія Піваварчук (узроставая катэгорыя В да 12 гадоў) і Паліна Уласень (узроставая катэгорыя С да 16 гадоў) у намінацыі “сольнае выкананне” адзначаны дыпломамі фіналістаў. Дастойна выступіць з сольнымі праграмамі дапамагла рабятам канцэртмайстар школы Ірына Кавалеўская.

Шчыра віншуем нашых выхаванцаў і іх педагогаў з удалым выступленнем на фестывалі-конкурсе “ЛьВёнок” і жадаем далейшых творчых поспехаў.

Ала КАРНІЦКАЯ,

кіраўнік аддзялення фартэпіяна, струнных і духавых інструментаў дзіцячай школы мастацтваў.

Фота з архіва ўстановы.