“Будаўнік” пацвердзіў клас

Закончыўся адкрыты чэмпіянат раёна па валейболе сярод мужчын. За чэмпіёнскі тытул у фінальнай стадыі змагаліся чатыры каманды: “Будаўнік — ПМК-14”, “Камунальнік”, “Чудзін” і малькавіцкі “Алімп”. У такім парадку яны размеркаваліся на папярэднім этапе. У паўфінале, згодна з палажэннем аб розыгрышы, першая каманда сустракалася з чацвёртай, другая — з трэцяй.

Ганцавіцкі “Будаўнік” не без цяжкасцей адолеў малькавіцкі “Алімп” — 3:1. Прычым, да гэтага гараджане не прайгравалі ніводнай партыі. “Чудзін” стаў мацнейшым у сустрэчы з “Камунальнікам” — 3:1.

Галоўныя матчы былі наперадзе — за званне чэмпіёнаў і за трэцяе, прызавое месца. Гэтыя паядынкі нікога не пакінулі раўнадушным. У кожнай партыі інтрыга захоўвалася да апошніх хвілін.

Спачатку на пляцоўку выйшлі ганцавіцкі “Камунальнік” і малькавіцкі “Алімп”. Яны аспрэчвалі бронзавыя медалі. Першую партыю даволі ўпэўнена выйгралі вясковыя спартсмены — 25:16. У другой лік некалькі разоў станавіўся роўным, прычым і напрыканцы (22:22). Усё ж партыя зноў засталася за “Алімпам” — 25:23. Аднак у далейшым “Камунальнік” праявіў сапраўдную згуртаванасць, высокае майстэрства, моцную вытрымку і выйграў апошнія тры рашаючыя партыі — 25:20, 25:20, 15:7.  Такім чынам, агульны лік матча 3:2 на карысць гараджан і ганаровае трэцяе месца.

У матчы за тытул чэмпіёнаў раёна сустрэліся ганцавіцкі “Будаўнік — ПМК-14” і “Чудзін”. Вяскоўцы аказалі даволі моцнае супраціўленне яўнаму фаварыту. У першай партыі будаўнікі з цяжкасцю вырвалі перамогу — 26:24. Нялёгка даліся перамогі гараджанам і ў астатніх дзвюх партыях — 25:21, 25:17. Выйграўшы рашаючы матч з лікам 3:0, “Будаўнік” пацвердзіў свой клас, заваяваўшы тытул чэмпіёнаў трэці год запар.

Важкі ўклад у арганізацыю спаборніцтваў і падрыхтоўку спартсменаў унеслі аддзел адукацыі, спорту і турызму райвыканкама (загадчык сектара спорту і турызму, галоўны суддзя спаборніцтваў Яўген Кабрынец), ФСК “Здароўе-7” (старшыня Міхаіл Ярашэвіч), інструктар-метадыст аддзялення валейбола Ганцавіцкай СДЮШАР Міхаіл Комар,  прадстаўнікі каманд Уладзімір Каркотка (“Будаўнік — МПК-14”), Міхаіл Леўчыкаў (“Чудзін”), Дзмітрый Турко (“Камунальнік”), Міхаіл Заяц (“Алімп”) і іншыя.

Ва ўрачыстай абстаноўцы каманда-пераможца і прызёры ўзнагароджаны кубкамі і медалямі. Былі вызначаны лепшыя па пазіцыях: нападаючы Арцём Караткоў, блакіруючы Міхаіл Дыдышка (абодва — “Будаўнік — ПМК-14”), звязуючы Аляксандр Рулінскі (“Чудзін”), абаронца Дзяніс Хандрыка (“Чудзін”). Лепшым іграком прызнаны Дзмітрый Турко (“Камунальнік”). У намінацыі “За волю да перамогі” прыз атрымаў Віктар Маляўка з малькавіцкага “Алімпа”. Сімвалічна, што ўзнагароды ўручылі ветэраны ганцавіцкага валейбола Аркадзь Турко, Міхаіл Бобка, Вячаслаў Савеня, Леанід Плакса, Уладзімір Гардзей і Антон Чыжэўскі.

Сёлетні чэмпіянат раёна па валейболу выліўся ў сапраўднае спартыўнае свята для балельшчыкаў.

Міхась АРЭШКА.

НА ЗДЫМКУ: чэмпіён раёна 2015 года па валейболе ганцавіцкі “Будаўнік — ПМК-14”. Злева направа: стаяць Ігар Караткоў, Арцём Караткоў, Міхаіл Дыдышка, Віталь Пуцята, Дзяніс Коўш, сядзяць Антон Мелехавец, Максім Піваварчык, Аляксандр Радзюк, Андрэй Глеб, прадстаўнік каманды Уладзімір Каркотка.

Фота аўтара.