І вёскі ў святочным убранні

Напярэдадні калядных і навагодніх свят Малькавіцкім сельвыканкамам быў аб’яўлены конкурс на лепшае святочнае ўбранне дамоў і падворкаў грамадзян, устаноў і арганізацый, размешчаных на тэрыторыі сельсавета. Дарэчы, такі конкурс праводзіцца ў нас на працягу апошніх пяці гадоў. І трэба адзначыць, што з кожным годам у ім удзельнічае ўсё больш і больш жыхароў.

Падведзены вынікі і цяперашняга конкурсу. Хто ж на гэты раз вылучыўся ва ў святочным упрыгожанні сваіх дамоў, устаноў і арганізацый? Трэба прызнаць, што членам журы няпроста было вылучыць найпрыгажэйшую сядзібу, падворак. Тым больш што ў конкурсе прыняло ўдзел каля сарака домаўладальнікаў. А пры падвядзенні яго вынікаў улічваліся ўпрыгожванне дамоў, гаспадарчых пабудоў ілюмінацыяй, наяўнасць навагодняй сімволікі: Дзеда Мароза, Снягуркі, казачных персанажаў. І ўсё ж члены журы справіліся са сваёй задачай, а мне хочацца назваць прозвішчы тых, хто любіць, цэніць прыгажосць і стварае яе вакол сябе ў любую пару года.

Сярод устаноў і арганізацый першае месца прысуджана калектыву ДУА “Малькавіцкая сярэдняя школа” (дырэктар Віктар Супрун), другое — калектыву Малькавіцкага лясніцтва (ляснічы Уладзімір Лагвіновіч), трэцяе — магазіна № 11 Лунінецкага АРЗ НОД-2 (загадчык Валянціна Лагвіновіч).

А найцікавей упрыгожылі свае падворкі Генадзь Занька, Аляксандр Сайка, Міхаіл Макуцэвіч, Віктар Засулевіч. Зіхацяць ад святочных ілюмінацый падворкі жыхароў аграгарадка Малькавічы Мікалая Мядзведзіка, Васіля Занькі — вуліца Школьная, Міхаіла Засулевіча — вуліца Першамайская, Аляксандра Занькі і Міхаіла Занькі — вуліца Пралетарская, Сяргея Хілютыча, Алены Лагвіновіч, Віктара Занькі, Сяргея Лагвіновіча — вуліца Савецкая і многіх іншых, хто захацеў стварыць сабе і аднавяскоўцам добры настрой.

Знаёмы ўсім выраз “Прыгажосць выратуе свет” сапраўды даказвае, што прыгажосць, створаная рукамі і творчым палётам думак чалавека-працаўніка, натхняе людзей на добрыя, стваральныя справы, усяляе надзею на перамогу дабра і святла над ценямі зла.

Па традыцыі, якая склалася ў нас, пераможцы гэтага святочнага зімовага конкурсу будуць ушанаваны ў дзень свята вёскі. Навагоднія агеньчыкі гараць зараз на ёлках, на вокнах, на веснічках нашых вяскоўцаў. З цягам часу гаспадары сядзіб прыбяруць іх да новых зімовых свят. А я хачу пажадаць сваім землякам, каб агеньчыкі жыццядайнага аптымізму, веры і любові ніколі не гаслі ў іх сэрцах.

Ніна БУЙКЕВІЧ, старшыня Малькавіцкага сельвыканкама.