Дзякуй за працу!

Прыгожыя жанчыны, сацыяльныя работнікі, якія даглядаюць пажылых людзей ў розных населеных пунктах раёна, сабраліся на гэтым конкурсе, каб паказаць свае таленты ў пяці конкурсных заданнях: у візітоўцы “Маё прызванне — сацыяльная праца”, у інтэлектуальным конкурсе “Эрудыт”, у конкурсе “Праблемная сітуацыя з практыкі”, дзе ўдзельніцы павінны былі праявіць уменне хутка знайсці выхад з нестандартных сітуацый, у творчым конкурсе “Таленавіты я і мая сям”я” і, нарэшце, у конкурсе кулінарных здольнасцей і іншых захапленняў “Я ўмею, я магу”.

Несумненна, конкурсныя заданні былі складанымі, але цікавымі. А таму кожная з удзельніц змагла праявіць усе свае здольнасці і творчы патэнцыял. Яны былі добра падрыхтаваныя да конкурсу, многім дапамагалі спраўляцца з заданнямі члены іх сем’яў. Ды і наогул, складана ацэньваць чалавека, які прысвячае жыццё клопату аб чужых людзях. А таму членам журы было няпроста прымаць рашэнне. Аднак, нарэшце, яно было прынята і месцы размеркаваліся наступным чынам:

4 месца атрымалі Зоя Міхайлава, в. Кукава-Бор і Алена Карповіч, г. Ганцавічы;

3 месца — Вераніка Наумік, в. Любашава;

2 месца — Людміла Хілюціч, в. Ліпск;

1 месца — Антаніна Засулевіч, в. Малькавічы.

Нягледзячы на прысуджаныя удзельніцам месцы, дырэктар ДУ “Тэрытарыяльны цэнтр сацыяльнага абслугоўвання насельніцтва” Таццяна Саладуха адзначыла, што кожная з жанчын — цудоўны работнік, яны выдатна спраўляюцца са сваімі абавязкамі, а таму ўзнагароджаны будуць усе.

Праца сацыяльнага работніка — няпростая і карпатлівая, для яе патрэбны цярпенне, вытрымка, добры, мяккі характар. А таму гэтыя жанчыны, што клапоцяцца не толькі пра сваю сям’ю, але і аб пажылых людзях, якія не маюць побач блізкіх, вартыя павагі і пашаны. Гэта — велізарная і вельмі патрэбная праца, за якую ім варта сказаць вялікі дзякуй.

Аляксандра ГУРМАН.

НА ЗДЫМКУ: пераможца конкурсу Антаніна Засулевіч атрымлівае ўзнагароду ад дырэктара цэнтра Таццяны Саладухі.

Фота аўтара.