ЖОРСТКАСЦЬ РЭАГАВАННЯ

У прысутнасці супрацоўнікаў міліцыі і грамадскасці пракурор раёна Сяргей Насеня выпісаў пастанову аб узяцці пад варту

гараджаніна Дзяніса Рамнёва, у адносінах да якога ўзбуджана крымінальная справа па артыкуле 364 Крымінальнага кодэкса Рэспублікі Беларусь “Насілле або пагроза прымянення насілля ў адносінах да супрацоўнікаў органаў унутраных спраў”, якім прадугледжваецца пазбаўленне волі да 6 гадоў.

Яшчэ 8 лістапада Дзяніс са сваім братам Андрэем працавалі на дачы, як расказаў падследны — абразалі ўчастак трактарам. На ім потым і паехалі дамоў. На аўтадарозе паміж вёскамі Любашава — Сукач іх спыніў супрацоўнік ДАІ. У гэты момант і разгарнуліся падзеі. Кіроўца трактара Андрэй быў п’яны і, каб пазбегнуць пакарання, Дзяніс вырашыў “заступіцца” за брата — учыніў бойку з інспектарам, некалькі разоў атрымлівалася яго паваліць на зямлю і ўсё для таго, каб брат паспеў уцячы. У выніку супрацоўнік міліцыі атрымаў цялесныя пашкоджанні.

Сам Рамнёў сваю віну поўнасцю прызнае, але адзначае, што ні якім чынам не хацеў нанесці міліцыянеру траўму, а толькі ўтрымаць, пакуль брат не збяжыць. Дарэчы, літаральна праз гадзіну пасля затрымання Дзяніса, у дзяжурную часць РАУС быў дастаўлены і яго брат Андрэй. Як затым засведчыў медыцынскі агляд, абодва правапарушальнікі былі вельмі п’янымі — алкатэстар паказаў 2,0 праміле алкаголю ў кожнага.

Пракурор раёна адзначыў, што кожны, хто вырашыць прымяніць насілле ў дачыненні да супрацоўнікаў міліцыі, а таксама іншых грамадзян, якія прадухіляюць ці перашкадаюць здзяйсненню супрацьпраўных дзеянняў, будзе адказваць па ўсёй строгасці закона. Улічваючы цяжкасць здзейсненага Дзянісам, а таксама яго “паслуговы” спіс ранейшых правапарушэнняў, сярод якіх — непадпарадкаванне супрацоўнікам міліцыі, дробнае хуліганства і кіраванне транспартным сродкам у стане алкагольнага ап’янення, пракурор і вынес пастанову аб узяцці апошняга да суда пад варту.

Як расказаў намеснік начальніка Ганцавіцкага аддзела Следчага камітэта Віталь Занька, сёлета гэта ўжо другая крымінальная справа па прымяненні насілля ў адносінах да супрацоўнікаў аддзялення дзяржаўтаінспекцыі РАУС. У верасні адзін з гараджан парушыў правілы стаянкі і прыпынку аўтамабіля каля гарадскога рынку, а потым, у ходзе разбіральніцтва правапарушэння з інспектарам ДАІ, нанёс яму некалькі ўдараў. Дарэчы, у мінулым годзе пацярпеў пры выкананні сваіх службовых абавязкаў і ўчастковы інспектар міліцыі, у адносінах да якога прымяніў насілле жыхар Хатыніч, за што і атрымаў пакаранне — 2 гады пазбаўлення волі.

Аляксей ГРУШЭВІЧ.

На здымках: пракурор раёна Сяргей Насеня; Дзяніс Рамнёў дае тлумачэнні сваім дзеянням.

Фота аўтара.