Пад цёплым утульным крылом (свята вёскі Будча)

Жыхары і госці Будчы ўрачыста адзначылі свята вёскі “Я ў гэтым краі не чужы”.

Сапраўды, як буслы вяртаюцца з выраю дамоў, гэтак жа зляцеліся на малую радзіму былыя будчакі. Любімая вёска зноў сагрэла іх сваім цёплым утульным крылом. Гэта ж яе дзеці, выгадаваныя з мацярынскай цеплынёй і пяшчотай.

Тутэйшыя жыхары ішлі на свята сем’ямі, вялі за рукі ці неслі на плячах сыночкаў і дачушак. Паабапал вуліц спыняліся легкавікі з мінскімі, віцебскімі, магілёўскімі нумарамі. Свята вёскі паклікала ўсіх, хто шануе свае родныя мясціны.

Пакрысе тэрыторыя ля будынка бібліятэкі і ўрачэбнай амбулаторыі набыла ўрачысты выгляд. І вось яно, жаданае імгненне! Пасвятлелі, расквеціліся ўсмешкамі твары вяскоўцаў. Свята пачалося.

З лёгкім імпэтам і дасціпным гумарам вялі праграму дырэктар Дома культуры Любоў Гузоўская і бібліятэкар Галіна Дайлід. Яны нікога не абмінулі, усім выказалі шмат цёплых слоў і шчырых пажаданняў.

Па традыцыі першым вітаў прысутных старшыня Чудзінскага сельвыканкама Анатоль Кіцік.

— У вёсцы Будча жывуць цудоўныя і працавітыя людзі, — адзначыў кіраўнік мясцовай улады. — Яны ганарацца землякамі, якія праславілі не толькі малую радзіму, але і Беларусь. Сярэбраны прызёр Алімпійскіх гульняў, чэмпіёнка свету па плаванні Аляксандра Герасіменя ў дзяцінстве шмат часу праводзіла ў Будчы. Тут нарадзіўся і жыў яе бацька — майстар спорту міжнароднага класа па лёгкай атлетыцы Віктар Герасіменя. Добра вядомы за межамі Ганцаўшчыны футбольны суддзя Канстанцін Дайлід. Адсюль родам доктар фізіка-матэматычных навук, прафесар Сцяпан Кандраценя, літаратуразнаўца Галіна Ішчанка. Усё свядомае жыццё прысвяцілі вывучэнню гісторыі Будчы, складанні яе летапісу Даніла Мануленка і Фёдар Карпеня. Вёска жыве і развіваецца. Тут беражліва захоўваюцца народныя традыцыі, гарманічна спалучаюцца гістарычная спадчына і поспехі цяперашняга пакалення.

Галоўны эканаміст СВК “Будча” Тамара Войцік агучыла важкія здабыткі мясцовых земляробаў. Сёлета хлебнае поле парадавала буйным коласам. Упершыню ў гаспадарцы намалацілі больш чым 5 тысяч тон збожжа, упершыню тры экіпажы камбайнераў сталі тысячнікамі. Зараз закладваецца трывалая аснова пад ураджай 2015 года. З выкананнем усіх агратэхнічных патрабаванняў механізатары вядуць сяўбу азімых збожжавых культур.

Што ж, трапна ў народзе кажуць: “Будзе хлеб — будзе і песня”. Лірычныя мелодыі, спакойныя і плаўныя, як рака-суседка Лань, паплылі па-над Будчай. Яны ўсцешвалі душу, лагодзілі сэрца, выклікаючы то лёгкі смутак, то трапяткую радасць.

У госці на свята завіталі самадзейныя артысты Вялікакруговіцкага СДК на чале з яго дырэктарам Вандай Чабатарэнка. Агульнымі сіламі канцэрт атрымаўся на славу. Песні народныя і сучасныя ўсіх з’ядналі ў адзіную суполку. Вось гэта таленавітасць! Натхнёна і вытанчана спявалі Людміла Ярашэвіч, Кацярына Гіль, Алена Мышкавец, Ангеліна Глебава, Наталля Фядосава, Аліна Глёкава, Ірына Рамашка, вакальны гурт “Вечарніцы”. Шквал апладысментаў выклікалі  выступленні саміх кіраўнікоў сельскіх устаноў культуры — Любові Гузоўскай і Ванды Чабатарэнкі.

Неяк неўпрыкмет падышла чарга дзяліць духмяны каравай з новага ўраджаю. Выпускніца Будчанскай сярэдняй школы Аліна Гушчэня, як клапатлівая гаспадыня, частавала ўсіх жадаючых.

Сёння будчанскую “прапіску” маюць 720 чалавек. Самай старэйшай жыхарцы Ксеніі Паўлаўне Кандрацені 7 ліпеня споўнілася 93 гады. Шмат чаго было на жыццёвым шляху жанчыны, аднак, нягледзячы на цяжкасці, паставіла на ногі дзяцей, мае ўнукаў і праўнука.

А вось новае пакаленне жыве ў шчасці і радасці. Сімвалічна, што ў двух дзетак дзень нараджэння супаў са святам вёскі. Чацвёртыя імяніны адзначыў Максім Ліхтар, сёмыя сустрэла Аляксандра Фёдарава. Як і доўгажыхарка, яны атрымалі каштоўныя падарункі. Не засталася без прыза і самая маленькая актыўная чытачка бібліятэкі Таццяна Сергіеня.

Дзякуючы адчувальнай дапамозе СВК “Будча” на чале з яго старшынёй Сяргеем Мышкаўцом, была праведзена бяспройгрышная латарэя. Уладальнікам білетаў дасталіся мяхі збожжа, пакеты грэчкі, рулоны саломы.

Самыя спрытныя аблюбавалі слуп з падарункамі на самым яго версе. Сярод юных альпіністаў запаветная вышыня пакарылася Аляксандру Захарчэні, Андрэю Савені, Віталю Рулінскаму і Дзянісу Мяльчонку.

Тым часам сонца ўсё бліжэй хілілася да небасхілу. Урачыстую частку свята цудоўна закончыла зямлячка, жыхарка Мінска Любоў Кішко. З выразнай інтанацыяй, па-майстэрску яна расказала казку пра шчасце.

Народнае гулянне працягвалася. У наступным годзе Будча адзначыць 500-гадовы юбілей. Гэтак жа, як і зараз, вёска  зноў адорыць сваіх жыхароў і гасцей мацярынскай ласкай, ахіне цёплым утульным крылом.

Міхась АРЭШКА. Фота аўтара.