Падман дзяржавы і людзей

Асобныя прыватныя прадпрыемствы і індывідуальныя прадпрымальнікі, каб па мінімуме плаціць падаткі і рабіць адлічэнні ў Фонд сацыяльнай абароны Міністэрства працы і сацабароны Рэспублікі Беларусь, заніжаюць дадзеныя па аплаце працы, альбо не адлюстроўваюць іх на рахунках прадпрыемства ўвогуле.

Фактычна заработная плата асобных работнікаў суб’ектаў малога прадпрымальніцтва значна вышэй за тую, якая адлюстравана ў ведамасцях налічэння і выплаты заработнай платы.

У той жа час у людзей, што атрымліваюць заработную плату “ў канвертах”, моцна зніжаецца іх сацыяльная абарона: дапамога па непрацаздольнасці, пенсія, іншыя сацыяльныя выплаты будуць налічвацца, зыходзячы толькі з афіцыйнай, адлюстраванай у бухгалтарскім уліку прадпрыемства, заработнай платы.

Дабіцца пэўнага поспеху ў барацьбе з такой негатыўнай з’явай дапамагае не толькі цеснае ўзаемадзеянне падатковых і праваахоўных органаў, але і інфармаванне гэтых службаў самімі людзьмі, якім наймальнік прапануе зарплату “ў канвертах”.

У мінулым годзе інспекцыяй у 6 суб’ектаў прадпрымальніцкай дзейнасці выяўлены парушэнні заканадаўства аб працы, у тым ліку ў двух арганізацыях з парушэннем артыкула 3 Закона Рэспублікі Беларусь № 124-3 ад 17.07.2002 года (са змяненнямі і дапаўненнямі) “Аб устанаўленні і парадку павышэння мінімальнай заработнай платы”. У іх налічваецца заработная плата ніжэй узроўню мінімальнай. Яшчэ ў 4 суб’ектаў гаспадарання выяўлены факты выплаты заработнай платы без адлюстравання ў рэгістрах бухгалтарскага ўліку, у тым ліку трыма індывідуальнымі прадпрымальнікамі прыцягваліся да прадпрымальніцкай дзейнасці наёмныя асобы. А ў адной арганізацыі выяўлены факты выплаты заробку “ў канвертах”.

Падчас выязных праверак сёлета ў трох суб’ектаў прадпрымальніцкай дзейнасці выяўлены факты выплаты заработнай платы без адлюстравання яе ў рэгістрах бухгалтарскага ўліку. Парушальнікамі сталі два індывідуальныя прадпрымальнікі і адна арганізацыя. Агульная сума адміністрацыйных штрафаў склала 13,8 мільёна рублёў.

У ходзе пазапланавай праверкі сялянска-фермерскай гаспадаркі “Аксяйчук” устаноўлена парушэнне часткі 1 артыкула 9 Закона Рэспублікі Беларусь ад 18.10.1994 года № 3321 –ХІІ “Аб бухгалтарскім уліку і справаздачнасці” (са змяненнямі і дапаўненнямі), а менавіта: заработная плата, адлюстраваная па рэгістрах бухгалтарскага ўліку значна адрозніваецца ад фактычна выплачанай. Акрамя гэтага, парушаны падпункт 1.1 пункта 1 Указа Прэзідэнта Рэспублікі Беларусь ад 6.07.2005 года № 314 “Аб некаторых мерах па абароне правоў грамадзян, якія выконваюць работу па грамадзянска-прававых і працоўных дагаворах”. Гаспадарка выконвала будаўнічыя работы без заключэння з грамадзянамі працоўных дагавораў у пісьмовай форме, а заработная плата, адпаведна, выплачвалася “ў канвертах”.

Інфармацыя па згаданых парушэннях накіравана ў Баранавіцкую міжраённую інспекцыю працы.

Аляксандр САКЕЛЬ,

намеснік начальніка — начальнік аддзела падаткаабкладання арганізацый і іншых даходаў інспекцыі Міністэрства па падатках і зборах Рэспублікі Беларусь па Ганцавіцкім раёне.