Як і раней, у страі!

Сцяпан Іванавіч Васілаў з’яўляецца жывым сведкам Вялікай Айчыннай вайны. У гэтым годзе, 15 жніўня, ён адзначыў свой 95-ы дзень нараджэння. Павіншаваць ветэрана з гэтым шаноўным юбілеем прыйшлі ваенны камісар Ганцавіцкага райваенкамата Валерый Касянюк, дырэктар тэрытарыяльнага цэнтра сацыяльнага абслугоўвання насельніцтва Наталля Зялёнка, старшыня раённага савета ветэранаў вайны і працы Яўгенія Стацько, адказны сакратар ветэранскай арганізацыі Алена Лелес, старшыня пярвічнай ветэранскай арганізацыі райспажыўтаварыства Святлана Балкіна, старшыня прафкама гэтай арганізацыі Сяргей Смаленскі, сацыяльны работнік Наталля Сахарэвіч, інспектар па асноўнай дзейнасці адапцыйна-сацыяльнай дапамогі на даму ТЦСАН Тамара Самусейка. 

У парадным пінжаку, з россыпам залатых медалёў на грудзях, сярод якіх медалі “За ўзяцце Берліна”, “За перамогу над Германіяй у Вялікай Айчыннай вайне 1941 — 1945 гг.”, “За адвагу” і ордэн Вялікай Айчыннай вайны II ступені, Сцяпан Іванавіч выйшаў да брамкі сустракаць дарагіх гасцей. Усіх прысутных уразіла, што чалавек, які прайшоў вайну, удзельнічаў у вызваленні Польшчы і ўзяцці Берліна, быў паранены падчас бамбардзіроўкі, змог захаваць такую бадзёрасць духу і выдатны настрой. Ён з падзякай прымаў віншаванні, падарункі, стараўся жартаваць і частаваў усіх прысмакамі, спяваў песні ваенных гадоў і нават станцаваў, нягледзячы на шаноўны ўзрост. Але  як бы ні стараўся забыцца ветэран, памяць вяртала да падзей тых страшных гадоў, калі ён юнаком абараняў Айчыну ад нямецка-фашысцкіх захопнікаў. І гэтыя ўспаміны выліваліся ў бясконцыя аповяды, якімі Сцяпан Іванавіч дзяліўся на працягу ўсёй сустрэчы. А вочы героя ў тыя моманты засцілаў смутак, ён быццам зноў перажываў цяжкія гадзіны ваеннага ліхалецця.

У гэты святочны дзень прагучала шмат шчырых слоў у адрас юбіляра, дзясяткі пажаданняў здароўя і даўгалецця.  А сам Сцяпан Іванавіч нікога не абышоў увагай, падзякаваў кожнаму за маленькае свята.

Тэкст і фота Ксеніі ЛУЦКО.