У Вялікіх Круговічах — свята

Адыходзіць лета. Адлічвае адзін за адным дні жнівень. Закончылася галоўная сельскагаспадарчая кампанія — уборка збожжавых культур. Ураджай парадаваў хлебаробаў. Цяпер можна крыху і адпачыць, павесяліцца.

Па традыцыі ў апошнім летнім месяцы праводзяцца святы вёсак — урачыстыя, незабыўныя відовішчы. У мінулую суботу святкавалі ў Вялікіх Круговічах. Свята так і называлася — “Квітней, мая любімая вёска!” і праходзіла ля разгалістага  дуба-волата. На імправізаванай сцэне радавалі песнямі самадзейныя артысты — салісты Кацярына Гіль, Алена і Крысціна Заяц, Дзіяна Радзюк, Уладзімір Туманік, вакальны ансамбль “Вечарніцы”. Жыхары Вялікіх Круговіч, Крышылавіч, Вострава, Кукава, Будчы і Дзяніскавіч атрымалі сапраўдную асалоду ад убачанага. Як, дарэчы, і госці з Мінска, Брэста, Крычава, Пастаў. Людзей сабралася шмат, як дарослых, так і дзяцей.

Старшыня праўлення мясцовага СВК “Крышылавічы” Сяргей Хадатчук задаволены. Папрацавалі на славу, можна і пасвяткаваць. Ды і цёплае сухое надвор’е спрыяла народнаму гулянню.

Вядучая свята, дырэктар СДК, стараста вёскі Ванда Чабатарэнка па-майстэрску, з жартамі і ўсур’ёз звярталася да прысутных. Цудоўныя песні гучалі ў выкананні мінскага ансамбля казацкай песні “Бацька атаман”. Радавала позірк стылізаваная сялянская хата. На своеасаблівых сталах прыцягвалі ўвагу саматканвыя вышытыя ручнікі майстрыхі Марыі Коўш. Усе жадаючыя маглі купіць білет бяспройгрышнай латарэі. А разыгрываліся жывёла і птушка. Жыўнасць прадаставілі мясцовыя жыхары Жанна Масюціна, Анатоль Заяц, Віктар Муха, Наталля Фядосава, Ірына Муха.

Удала ўпісаўся ў агульную палітру свята юбілей Аляксандра і Вольгі Велесаў. 45 гадоў пражылі яны ў каханні ды згодзе, паказваючы добры прыклад маладым.

Ахвотнікі маглі пакаштаваць каравай з новага ўраджаю. З 70-годдзем павіншавала калектыў мясцовай бібліятэкі яе былая работніца Святлана Зялёнка. Самым спрытным дасталіся прызы, якія былі замацаваны на высокім слупе. Іх атрымалі  Іван Гардзей, Максім Зайкоўскі, Іван Сідарэвіч і іншыя.

На свяце не абышлі ўвагай ніводную ўстанову на тэрыторыі мясцовага сельсавета. Шчыра павіншаваў землякоў дырэктар Вялікакруговіцкай сярэдняй школы Аляксандр Занька.

Народнае гулянне працягвалася да поўначы, пры ззянні электрычных лямпачак. Людзі пускаліся ў скокі, жартавалі, весяліліся. Паўсюдна панаваў цудоўны настрой.

А дапамаглі стварыць запамінальнае свята спонсары — СВК “Крышылавічы”, УП “Ганцавіцкае ПМС”, Круговіцкае лясніцтва, прадпрымальнікі Вячаслаў Віктаровіч,Таццяна Васілевіч і іншыя.

Умеюць вяскоўцы працаваць, умеюць і весяліцца. Сведчанне таму —  свята ў вёсцы Вялікія Круговічы.

Міхась АРЭШКА. Фота аўтара.