Не стаць ахвярай інфекцыі

Эпідэміялагічная сітуацыя па захворванні на вострыя кішэчныя інфекцыі ў нашым раёне застаецца стабільнай і кантралюемай.

Па выніках за 7 месяцаў 2014 года ў раёне іх зарэгістравана 24 выпадкі, з якіх 4 — інфекцыйнай этыялогіі. Успышак (групавога) захворвання не зарэгістравана.

Ва ўмовах гарачыні, з мэтай недапушчэння захворванняў на вострыя кішэчныя інфекцыі раённы цэнтр гігіены і эпідэміялогіі рэкамендуе строга захоўваць правілы асабістай гігіены.

Вострыя кішэчныя інфекцыі — гэта шматлікая група інфекцыйных хвароб, якія выклікаюцца рознымі мікраарганізмамі, прасцейшымі бактэрыямі, вірусамі, у пераважнай большасці з паражэннем страўнікава-кішачнага тракта. Узбуджальнікі інфекцыі ў арганізм чалавека трапляюць з ежай, вадой, у маленькіх дзяцей праз брудныя рукі, цацкі. Летам ёсць усе спрыяльныя ўмовы  для размнажэння і захавання ўзбуджальнікаў у акаляючым асяроддзі. Пры масавым назапашванні, верагоднасць таго, што ўзбуджальнік трапіць у  страўнікава-кішачны тракт чалавека, павялічваецца, адпаведна павялічваецца верагоднасць узнікнення захворвання. У гарачае надвор’е гэтая небяспека ўзрастае. Са змяненнем метэаўмоў (рэзкае павышэнне тэмпературы паветра) узрастае таксама верагоднасць парушэнняў тэмпературных умоў захоўвання і рэалізацыі харчовых прадуктаў, якія хутка псуюцца, што можа паслужыць прычынай хваробы.

Забруджванне харчовых прадуктаў можа адбыцца ў выніку парушэння правілаў асабістай гігіены пры прыгатаванні, кулінарнай і тэрмічнай апрацоўцы, пры парушэнні правілаў і тэрмінаў транспарціроўкі, захоўвання, рэалізацыі харчовых прадуктаў і кулінарных страў.

Трэба памятаць, што вострыя кішэчныя інфекцыі могуць выклікаць любыя недабраякасныя харчовыя прадукты. Варта звяртаць увагу на тэрмін прыгоднасці, на тое, у якіх умовах рэалізуецца прадукцыя, ці маецца халадзільнае абсталяванне для яе захоўвання, і ў выпадку ўзнікнення сумнення ў якасці тавару ад пакупкі лепш устрымацца.

Асабліва актуальнае гэтае пытанне для скорапсавальных малочных і мясных харчовых прадуктаў, вырабаў з крэму, якія патрабуюць асаблівых рэжымаў захоўвання і часта маюць кароткія тэрміны рэалізацыі. Таму ў першую чаргу звяртайце ўвагу на маркіроўку прадукцыі.

І яшчэ некалькі рэкамендацый па прафілактыцы вострых кішэчных інфекцый. Бахчавыя культуры не варта купляць у разрэзаным выглядзе, бо мікраарганізмы з паверхні лёгка пераносяцца  і размнажаюцца ў мякаці. Агародніну і фрукты перад ужываннем неабходна добра прамываць пад праточнай вадой. Усе харчовыя прадукты трэба трымаць у чыстым посудзе, скорапсавальныя — у межах дапушчальных тэрмінаў у халадзільніку. Гатовыя да ўжывання прадукты лепш трымаць асобна ад сырых. Салаты і вінегрэты з’ядайце адразу пасля прыгатавання, у крайнім выпадку, яны могуць захоўвацца ў халадзільніку не больш чым 12 гадзін. Харчовыя прадукты, калі яны застаюцца на наступны дзень, неабходна падвяргаць тэрмічнай апрацоўцы. Строга прытрымлівайцеся правілаў асабістай гігіены: мыйце рукі з мылам перад прыгатаваннем і прыёмам ежы, пасля наведвання туалета, прагулак на вуліцы.

Алена АМЕЛЬЯНОВІЧ,

памочнік

урача-эпідэміёлага райЦГіЭ.