Небяспечная вада

У спякотныя дні вялікая колькасць людзей адпачывае на берагах вадаёмаў. У той жа час варта памятаць, што гэта можна рабіць толькі ў адведзеных і абсталяваных месцах. У нашым раёне — зона адпачынку на пляжы “Паўднёвы” і на возеры Чырвонае (чыгуначная станцыя Люсіна).

Яшчэ ў верасні 2013 года пракуратурай раёна было вынесена прадстаўленне ў раённы выканаўчы камітэт аб ухіленні парушэнняў заканадаўства па арганізацыі і занятасці дзяцей у летні перыяд, забеспячэнні іх бяспекі, ахове іх жыцця і здароўя на тэрыторыі раёна, а таксама забеспячэнні бяспекі дзяцей на вадзе. У адпаведнасці з дакументам былі прыняты ўсе неабходныя меры і створаны належныя ўмовы для адпачынку, у тым ліку і ў згаданых зонах.

Між тым праблема гібелі дзяцей у вобласці ад знешніх прычын паўстае даволі востра. Толькі за адзін тыдзень з 20 па 27 ліпеня на Брэстчыне загінулі 5 дзяцей, з якіх 4 — утапіліся і адно стала ахвярай дарожна-транспартнага здарэння. Адна з асноўных прычын — неналежны кантроль за дзецьмі з боку бацькоў ці асоб, якія іх замяняюць, а таксама недастатковая работа суб’ектаў прафілактыкі.

Шмат выпадкаў, калі дарослыя і дзеці купаюцца ў месцах, дзе гэта забаронена. У сваю чаргу суб’екты прафілактыкі, найперш, супрацоўнікі міліцыі і таварыства выратавання на вадзе не ў поўнай меры прымаюць меры па недапушчэнні гэтага. Больш таго, шмат недапрацовак і па прафілактыцы гібелі на вадзе ў месцах масавага адпачынку каля вадаёмаў, дзе дазволена купацца. Размова ідзе, у першую чаргу, аб ужыванні алкаголю, што часта прыводзіць да трагедыі.

Таму нагадваем яшчэ раз, што купацца дазваляецца толькі ў абсталяваных для гэтага месцах. Ужыванне алкаголю пры купанні строга забаронена. А бацькам варта абавязкова сачыць за сваімі дзецьмі і ні ў якім выпадку не адпускаць іх адных купацца, тым больш у забароненых месцах.

Сяргей НАСЕНЯ, пракурор Ганцавіцкага раёна.