Бальзам табе на галаву…

Калі чалавек цяжка і доўга хварэе, дык гатовы ўхапіцца нават за “саломінку”, каб выратавацца, і на лячэнне ў такіх выпадках грошай не шкадуе.

Па Беларусі гастралююць асобы, якія гатовы дапамагчы хворым нават пры самай  цяжкай хваробе. Дастаткова ў іх набыць “сродкі са старадаўняй гісторыяй”.

Вось з паштовай скрыні дастаў рэкламную лістоўку, у якой расхвальваецца бальзам “100 даров” і крэм “Эффектум”.

Здаецца, няма тых хвароб, ад якіх не вылечылі б тыя бальзам і крэм. Інсульты, інфаркты, язвы, астмы… пакінуць нямоглых, як толькі яны купяць названыя БАДы. Праўда, што гэта біялагічна-актыўныя дабаўкі, у рэкламе не сказана. “Из отчаявшейся больной женщины-инвалида дочь превратилась в сияющую красотой и здоровьем привлекательную даму,” — сцвярджаецца ў лістоўцы.

А каб больш было даверу, 20 чалавек распавядаюць, як яны выздаравелі, дзякуючы вядомым нам дабаўкам.

Складваецца ўражанне, што ўжо не трэба дактары, бальніцы і лекі. Проста неабходна набыць бальзам “100 даров” і праблема будзе закрыта. Праўда, адной упакоўкі будзе недастаткова. Для прафілактычнага курса неабходны дзве, а для поўнага — чатыры ўпакоўкі, а гэта ўжо 680 тысяч рублёў.

Ва ўсім ёсць мяжа, але, напэўна, не ў дадзеным выпадку. Крэм “Эффектум” падаецца, як “беспрецедентный триумф российской науки”. Калі ёсць праблемы з суставамі, мазгавым кровазваротам, дастаткова будзе  панаціраць хворае месца крэмам. Кошт лячэння амаль такі ж, як бальзаму — 640 тысяч рублёў. А самае цікавае, у гэтай рэкламнай агітцы напісана малюпасенькім шрыфтам у самым нізе рэкламнага аркуша: “Не является лекарственным средством”. Гэтая зноска звязана з патрабаваннем Міністэрства аховы здароўя. Такую інфармацыю абавязаны даваць усе вытворцы БАДаў.

Колькі разоў  раскрываліся махінацыі  з дабаўкамі, а “воз усё там жа”. Існуе магутная індустрыя па вытворчасці такіх  прэпаратаў, а гэта значыць, што павінна быць адладжаная сетка па іх рэалізацыі.

Чаго грашыць супраць ісціны, але здараецца і ўрачы спрыяюць гэтаму. Рэкамендуюць, а як не верыць чалавеку ў белым халаце, калі ты хворы. Я маю на ўвазе факты, з якімі давялося сутыкнуцца самому.

А ў загадчыка тэрапеўтычнага аддзялення Ганцавіцкай  райбальніцы Віталя Дуброўнага свая думка.

— Навуковых даследаванняў БАДаў  ніхто не праводзіў. Ды ўвогуле, да лякарства яны не маюць ніякіх адносін. Гэта як тая ж ежа, у якую дадалі крыху больш, напрыклад, вітаміну С. А тое, што дабаўкі лечаць, гэта шырока распаўсюджаная памылка.

— Віталь Генадзьевіч, адкуль тады ўзяліся БАДы?

— На мой погляд, гэта даволі зручная назва, якая прыжылася і стала абрэвіятурай прадукцыі. Адным словам, адкуль ўзяліся БАДы — невядома, але, безумоўна, за імі стаяць  канкрэтныя людзі. Сёння на дабаўках робяць грошы — гэта бізнэс.

— А ўрач можа выпісаць БАДы?

— Калі пацыент пажадае, то чаму і не. Дарэчы, кожны чалавек можа свабодна  іх купіць і без урача.

— Тады хочацца пацікавіцца: “А шкоды дабаўкі  не зробяць хвораму?”.

— Малым дзецям БАДы не даюць, а дарослым  можна прымаць разам з лекамі, але зноў жа, па жаданні чалавека.

Наконт шкоды, то тут многае залежыць ад вытворцаў і іх сумлення. Нейкі час таму было шмат шуму ў Расіі наконт кітайскіх БАДаў.

Справа ў тым, што былі ўстаноўлены факты наяўнасці ў іх лёгкіх наркатычных рэчываў. Хворы прымаў такія дабаўкі і яму станавілася лягчэй, але неўзабаве боль вяртаўся і чалавеку зноў хацелася прымаць дабаўку. З часам дозу неабходна было павялічваць.

Трэба памятаць, што мы жывём у прагматычны час і калі нехта так клапоціцца аб нашым здароўі, то, напэўна, хоча з гэтага нешта мець.

Не будзем спадзявацца на цуд. Калі дактары не могуць вылечыць, то хто дапаможа чалавеку?

Уладзіслаў Снітка.