Покліч жніва ўсё гучней…

Здаецца, зусім нядаўна, працаўнікі сяла рупіліся на сяўбе, як ужо вядзецца нарыхтоўка кармоў. І вось надыходзіць самы адказны час для ўсіх работнікаў сельгасарганізацый — час жніва.

“Калі дазволіць надвор’е, ужо на наступным тыдні прыступім да ўборкі рапсу і насення шматгадовах траў, — адзначыў у размове начальнік упраўлення сельскай гаспадаркі і харчавання райвыканкама Юрый Лелес. — Ці варта гаварыць, што значыць на сяле час жніва — напружанай працы, калі неабходна ў аптымальныя тэрміны і якасна сабраць вырашчаны ўраджай, дзеля якога шчыравалі на працягу года. А затым яшчэ і захаваць яго”.

Традыцыйна аднымі з першых у раёне распачынаюць жніво хлебаробы СВК “Дубнякі”, землі якога знаходзяцца на ўзвышшы і маюць пераважна пясчаную глебу. Старшыня сельгаскааператыва Уладзімір Грыгаран упэўнена чакае толькі часу, каб вывесці тэхніку на ніву. “Зернесушыльная гаспадарка поўнасцю гатова. Для ўборкі адначасова некалькіх сельгаскультур падрыхтаваны тры сушылкі. Дровы таксама ёсць, — расказвае Уладзімір Ваганавіч. — Склады практычна даведзены да ладу — застаецца толькі завяршыць некаторыя работы. Тут пытанняў няма. Тым больш, што за гэты ўчастак адказвае загадчыца зернескладоў Тамара Муха. Дзякуючы ёй сістэма арганізацыі работы працуе без збояў. Што датычыцца тэхнікі, то 4 з 6 камбайнаў ужо знаходзяцца на лінейцы гатоўнасці. Падрыхтоўку астатніх завершым на працягу тыдня. З камплектуючымі і запчасткамі таксама праблем няма. Зараз галоўнае, каб надвор’е не падвяло…”.

Між іншым, упэўненасць старшыні грунтуецца на пастаяннай мэтанакіраванай рабоце. Добра вядома, што падрыхтоўка да наступнага жніва распачынаецца падчас пастаноўкі тэхнікі на зімовае захоўванне. Калі зрабілі гэта якасна, то і на наступны год узнікае менш пытанняў. Тут, безумоўна, вялікую ролю адыгрывае работа механізатараў і галоўнага інжынера Мікалая Равінскага, які, як заўважыў старшыня, прапусціў літаральна кожную адзінку тэхнікі праз свае рукі і арганізоўвае ўсю работу на сваім участку.

Надыходзіць пара ўборкі рапсу, насення шматгадовых траў (купоўкі (ежи) зборнай). “З іх і распачнем жніво, — працягвае размову Уладзімір Ваганавіч. — У цэлым ураджай павінен быць някепскі. Па пасевах з упэўненасцю можна меркаваць, што добра ўродзяць азімыя культуры — жыта і трыцікале. А вось яравыя — не зусім. Даволі мокрая вясна гэтаму перашкодзіла. Наперадзе шмат работы, улічваючы, што землі гаспадаркі з далучэннем “Агра-Начы” значна пашырыліся”.

Пасля сустрэчы са старшынёй сельгаскааператыва заехалі на мехдвор. На рамонце старога камбайна ў гэты час шчыраваў разам з механізатарамі загадчык майстэрняў Аляксандр Крывахат. Па яго сур’ёзным твары было відаць, наколькі важна хутчэй давесці да ладу тэхніку. Гэта і зразумела — інакш і быць не можа.

Аляксей Грушэвіч.

Фота аўтара.