З павагай і клопатам

Сёлета разам з галоўным святам, Днём Незалежнасці, наша краіна адзначае 70-годдзе з дня вызвалення Беларусі ад нямецка-фашысцкіх захопнікаў. Знамянальная дата — менавіта столькі гадоў беларусы жывуць пад мірным небам. Але не сціраецца з памяці людской трагедыя вайны, яе жахі, жыве подзвіг народа, які змагаўся за сваю свабоду.

Дзяржаўны клопат аб кожным з ветэранаў Вялікай Айчыннай вайны, вязнях фашызму і асобах, што пацярпелі ад наступстваў ваеннага ліхалецця, штодзённы, і ён праяўляецца ва ўсім.

На Ганцаўшчыне зараз пражываюць 66 чалавек, якія на ўласным лёсе спазналі ўвесь боль, які нясе вайна.

Напярэдадні святкавання Дня Незалежнасці і 70-годдзя вызвалення Беларусі, у адпаведнасці з Указам Прэзідэнта Рэспублікі Беларусь Аляксандра Лукашэнкі, ім уручаюцца юбілейныя медалі, а таксама каштоўныя падарункі ад раённага выканаўчага камітэта.

На гэтым тыдні павіншавалі з надыходзячым святам вязняў фашызму. Гараджанін Уладзімір Кандрацюк падчас уручэння юбілейных медалёў і падарункаў адзначыў, што, безумоўна, вязні фашызму не адстойвалі свабоду свайго народа на палях вайны, але іх жыццё таксама падвяргалася вялікай небяспецы, ужо не гаворачы пра іх бацькоў. Ва ўсёй паўнаце спазналі яны і цяжкія пасляваенныя гады. І памяць аб гэтым застаецца назаўсёды ў сэрцы. Менавіта мір — адна з самых важных каштоўнасцей для ўсяго чалавецтва.

Час няўмольны, і многім больш старэйшым ветэранам вайны ўжо не дазваляе здароўе ўдзельнічаць ва ўрачыстасцях, таму супрацоўнікі райвыканкама і райваенкамата наведваюць іх на даму.

І гэта толькі частка той павагі і клопату дзяржавы да ветэранаў, усіх, хто на ўласным лёсе спазнаў жахі ваеннага ліхалецця.

На здымку: ваенны камісар раёна Валерый Касянюк уручае юбілейны медаль вязню фашызму Віталію Сёміну.

Уласн. інф.