Нізка вам пакланіцца мы хочам…

“Здароўе — даражэй за золата”. Па-сапраўднаму пачынаеш разумець мудрасць гэтага выказвання англійскага драматурга Вільяма Шэкспіра, калі адольваюць неадступныя хваробы, калі надакучлівы боль перашкаджае радавацца нават самым прыемным навінам, калі з-за яго, здаецца, і сонца не так ярка свеціць і грэе.

Да каго мы спяшаемся за паратункам у такіх выпадках? Ну, вядома ж, да медыцынскіх работнікаў. Нялёгкая ў іх работа, але надзвычай высакародная: вяртаючы нам, пацыентам, здароўе, яны вяртаюць нас да жыцця. А гэта дарагога варта. Сцвярджаем так, бо пабывалі, як кажуць, у кіпцюрах хваробы, і нас не раз ставілі на ногі медыцынскія работнікі райбальніцы.

Вось і нядаўна нам давялося “рамантаваць” сваё здароўе ў хірургічным аддзяленні райбальніцы, якое ўзначальвае вопытны ўрач Сяргей Стральчэня. Хто з нас упершыню трапіў сюды, хто змагаецца з хранічнымі балячкамі не першы раз, але ўсе мы пераканаліся: тут працуюць верныя свайму прызванню людзі. Дабрата і суперажыванне, шчырае жаданне дапамагчы чалавеку справіцца з хваробай, чуласць і прафесіяналізм урачоў, медыцынскіх сясцёр, падтрымка санітарак і іншага персаналу аддзялення, добразычлівая атмасфера робяць сваю добрую справу: боль адступае, святло становіцца ярчэйшым і хочацца жыць, працаваць, любавацца навакольным асяроддзем.

Нашым лечачым урачом быў малады, але граматны хірург Сяргей Падгайскі. Адчуваецца, што ён не выпадковы чалавек у медыцыне, што мае трывалыя веды, якія так патрэбны ўсім, хто стаіць на варце здароўя людзей.

Нельга не сказаць цёплых слоў удзячнасці ўсяму медперсаналу хірургічнага аддзялення, а таксама тым, хто працуе ў адной звязцы з ім і чыё старанне і бездакорная праца — на карысць пацыентам. Мы маем на ўвазе масажыстаў, у прыватнасці, Антаніну Галубовіч,  цудоўны калектыў фізіятэрапеўтычнага кабінета, работу якога ўзначальвае Людміла Мартыновіч. Не будзем пералічваць усіх, хто працуе ў хірургічным аддзяленні, а таксама ў іншых службах райбальніцы, ад якіх у многім залежыць наша выздараўленне, бо спіс атрымаецца ўнушальным. Але ведайце: мы ад шчырага сэрца ўдзячны вам за тое, што вяртаеце нам самае каштоўнае багацце — здароўе. І напярэдадні вашага прафесійнага свята прыміце ад нас нізкі паклон. Хай вас саміх і вашых блізкіх абыходзяць бокам хваробы. Будзьце шчаслівымі!

Іван ШАПЯЛЕВІЧ, Уладзімір МАТУЛІС, ганцаўчане,

Аляксей Швайка, жыхар в. Дзяніскавічы.