Забойства ў Раздзялавічах

Увечары, 11 чэрвеня, у райаддзел унутраных спраў паступіла паведамленне аб тым, што недалёка ад аднаго з дамоў у вёсцы Раздзялавічы знойдзены труп В. На наступны дзень у РАУС складзены пратакол яўкі з пакаяннем жыхара той жа вёскі Р., які расказаў, што 7 чэрвеня ў 23.40 з-за рэўнасці да жонкі ён нанёс В. адзін удар нажом у вобласць грудзей. Праверку па гэтай справе праводзіць РАСК.

Не даглядзеў кароў

У мінулую сераду ў РАУС паступіла паведамленне ад Д., які жыве ў Востраве. Ён расказаў супрацоўнікам міліцыі аб тым, што п’яны пастух С. пусціў вясковых кароў да яго ў агарод, а тыя, у сваю чаргу, знішчылі ўсе пасевы Д. Па гэтай справе праводзіцца праверка.

Выявілі самагоншчыка

Не так часта ў міліцэйскіх зводках з’яўляецца інфармацыя аб затрыманых самагоншчыках. На мінулым тыдні вартавыя парадку знайшлі тых, хто займаецца такой справай у Задуб’і. Лейтэнант міліцыі падаў рапарт аб тым, што ў С. выяўлены факт вырабу і захоўвання самагонкі.

“П’яны” аўторак

Мінулы аўторак, 10 чэрвеня, увогуле можна неафіцыйна прызнаць самым “п’яным” днём за тыдзень у нашым раёне. Практычна кожнае паведамленне датычылася людзей, якія ўжывалі алкаголь.

Напіўся зранку. Ганцаўчанка А. паведаміла супрацоўнікам міліцыі аб тым, што яе сын знаходзіцца ў п’яным стане на двары каля хаты. Паведамленне паступіла а дзясятай гадзіне раніцы.

Нецвярозыя — на Кастрычніцкай. Наступнае паведамленне аб п’яных паступіла ўжо ў 17.28. Невядомы па тэлефоне ў міліцыю расказаў, што ў райцэнтры каля дома № 32, што па вуліцы Кастрычніцкай, знаходзяцца грамадзяне ў п’яным стане.

Муж п’е ўжо два тыдні. У 18.57 — званок у міліцыю ад жыхаркі Хатыніч К. Яна расказала вартавым парадку, што яе муж ужо на працягу двух тыдняў злоўжывае спіртнымі напоямі, перашкаджае ёй адпачываць, скандаліць.

Паламаў кветкі. А палове восьмай вечара ў РАУС паступіла паведамленне ганцаўчанкі А. Яна расказала, што сусед, які знаходзіўся ў п’яным стане, паламаў усе кветкі ў двары каля дома.

Не пускаў дахаты бацьку. 19.43 — званок з Будчы. К. скардзіцца на сына і сцвярджае, што той у няцвярозым стане зачыніўся ў хаце. Бацьку сынок пускаць не хацеў.

Збіваў п’яны муж. Амаль што праз тры хвіліны ў РАУС паступае новае паведамленне. На гэты раз зноў з райцэнтра. Ганцаўчанка Ш. скардзіцца на мужа і сцвярджае, што той, п’яны, збівае яе.

Памёр у алкагольнай коме. Апошні званок падводзіць рысу гэтаму дню. Як быццам нагадвае: тое, што рабілася на працягу дня, — ненармальна, а пастаянныя п’янкі нічым добрым для людзей не скончацца. Ноччу, у 23.57 дзяжурная медсястра прыёмнага пакоя райбальніцы паведаміла аб тым, што брыгадай хуткай дапамогі быў дастаўлены К. з дыягназам “алкагольная кома”. Не прайшло і гадзіны, як К. памёр.

ДАІ

За кіраванне транспартнымі сродкамі ў стане алкагольнага ап’янення затрыманы:  Ганна Іванаўна Сайко, 1971 года нараджэння, жыхарка в. Ліпск, кіравала асабістай аўтамашынай “Рэно-Лагуна”; навучэнец Ганцавіцкага прафліцэя Дзмітрый Аляксандравіч Галуза, 1996 года нараджэння, жыхар в. Люсіна, кіраваў матацыклам “ІЖ-Планета-5”; навучэнец Ганцавіцкага прафліцэя Канстанцін Аляксандравіч Жалезны, 1997 года нараджэння, жыхар в. Хатынічы, кіраваў матацыклам “ІЖ-Планета-5”.

Зводкі чытала Аксана МІНІНА.