Да зімы рыхтуемся летам

Падводзячы вынікі ацяпляльнага сезона 2013 — 2014 гадоў, трэба адзначыць, што для прадпрыемстваў і арганізацый раёна ён прайшоў без сур’ёзных перабояў у цеплазабеспячэнні. У мінулым годзе выкананы дастаткова вялікія аб’ёмы работ па замене і рамонце цеплавых сетак КУШВП ЖКГ “Ганцавіцкая РЖГ”. Кацельні і спажыўцы цеплавой энергіі ў асноўным на высокім узроўні і своечасова падрыхтаваліся да зімы, выканалі неабходны комплекс работ.

У цэлым узровень падрыхтоўкі цеплакрыніц, цеплавых сетак і сістэм цеплазабеспячэння да асенне-зімовага перыяду ў раёне ўзрос. Але гэта не падстава для самазаспакаення. Ужо зараз неабходна ўдзяліць самую сур’ёзную ўвагу работам па замене цеплавых сетак, рамонце цеплавой ізаляцыі трубаправодаў цеплазабеспячэння, правядзенню прамывак і выпрабаванняў сістэм ацяплення.

Так, у адпаведнасці з “Правіламі падрыхтоўкі і правядзення асенне-зімовага перыяду энергазабяспечваючымі арганізацыямі і спажыўцамі цеплавой энергіі” да 20 верасня павінны быць закончаны ўсе работы на абсталяванні цеплакрыніц, цеплавых сетках, а таксама ў спажыўцоў цеплавой энергіі і ў жыллёвым фондзе. Да 1 кастрычніка неабходна закончыць афармленне ўсёй арганізацыйна-тэхнічнай дакументацыі, у тым ліку пашпартоў гатоўнасці спажыўцоў цеплавой энергіі і цеплакрыніц да работы ў асенне-зімовы перыяд.

У нашым раёне налічваецца 109 спажыўцоў цеплавой энергіі, якія маюць на сваім балансе 254 аб’екты і 49 цеплакрыніц, якім неабходна атрымаць пашпарты гатоўнасці да работы ў асенне-зімовы перыяд.

На заканчэнне трэба адзначыць, што за непрыняцце мер па падрыхтоўцы да работы ў асенне-зімовы перыяд КоАП прадугледжвае пакаранне ў выглядзе штрафу ад 4 да 10 базавых велічынь фізічных асоб, да 100 базавых велічынь —  індывідуальных прадпрымальнікаў, і да 500 — юрыдычных асоб.

Аляксандр БАРОДЗІЧ,

інспектар

энерганагляду.