Радасць выздараўлення

Усе бацькі ведаюць як невыносна цяжка на сэрцы, калі тваё дзіця захварэла. Нават пры звычайнай прастудзе часта ўстаеш ноччу і прыглядаеш за малым: як спіць, дыхае, ці няма тэмпературы. А даходзіць да бальніцы, дык, увогуле, не знаходзіш спакою. Але хваляванні паступова праходзяць, калі дзіця ідзе на папраўку і бачыш, як па-добраму, з любоўю да малых адносіцца ўвесь медперсанал у дзіцячым аддзяленні цэнтральнай раённай бальніцы.

Загадчыца аддзялення Людміла Праневіч звыш 30 гадоў жыцця аддала дзецям. “Наша аддзяленне для мяне, як другі дом, другая сям’я — заўважае ўрач. — Работа наша, як і любога медработніка, вельмі адказная і складаная, але, ведаеце, колькі радасці прыносіць выздараўленне дзетак! Сапраўды, калі любіш сваю прафесію і дзяцей, то і жывеш работай, атрымліваеш ад яе асалоду і задавальненне…”.

І тут не толькі важна знайсці падыход да дзяцей, варта наладзіць кантакт і з бацькамі маленькіх пацыентаў — растлумачыць, супакоіць, усяліць аптымізм, падтрымаць. На сваім вопыце ведаю: урачы аддзялення Людміла Праневіч і раённы ўрач-педыятар Аляксандр Лагодзіч — прафесіяналы сваёй справы. Увогуле, увесь калектыў медработнікаў дзіцячага аддзялення цудоўны, бо кожны не абмяжоўваецца сваімі абавязкамі, а па-бацькоўску адносіцца да малых, якія  трапілі на бальнічны ложак. Між іншым, камфорт, атмасфера дабрыні ў аддзяленні і, зразумела, паспяховае і хуткае выздараўленне маленькіх пацыентаў, як адзначыла Людміла Праневіч,   залежыць ад намаганняў усіх медыкаў. Сярод іх шмат гадоў прысвяцілі сваёй рабоце старшая медсястра аддзялення Зоя Кірыковіч, сястра-гаспадыня Святлана Віннік, медсёстры Ала Высоцкая, Валянціна Сайка і Надзея Бондар, санітарка Людміла Гарадзецкая і раздатчыца Марына Машковіч.

Застаў на прыёме ў Людмілы Міхайлаўны гараджанку Наталлю Зялёнка са сваімі траімі дзецьмі: Антон, Аляксандра і Яўгенія радасна круціліся ў прадчуванні выпіскі. І маці з цеплынёй і ўдзячнасцю выказалася наконт работы аддзялення. “Ведаеце, не ўпершыню даводзіцца дзеткам лячыцца тут і я вельмі ўдзячна, што менавіта ў нашай райбальніцы такі зладжаны і адказны калектыў медработнікаў, — гаворыць Наталля. — Дай Бог ім здароўя і шчасця…”.

Між іншым, перад выпіскай бацькі атрымліваюць кансультацыю па ўмацаванню здароўя дзетак і пры любых узнікаючых пытаннях урачы раюць адразу ж зноў звяртацца да іх. “Здароўе дзіцяці залежыць не толькі ад паўнацэннага харчавання, яго актыўнасці і рухавасці, — акцэнтуе ўвагу Людміла Міхайлаўна. — Вельмі важна, каб і бацькі вялі здаровы лад жыцця, а ў сям’і панавалі лад і згода. Тады і дзеткі будуць менш хварэць”.

Аляксей Грушэвіч.

На здымку: загадчыца дзіцячага аддзялення райбальніцы Людміла Праневіч з Наталляй Зялёнка і яе дзеткамі.

Фота аўтара.