“Брэстчына за здаровы лад жыцця”

Наўрад ці знойдзецца чалавек, гатовы абвергнуць вядомае выказванне Шапенгаўэра: “Здаровы жабрак шчаслівейшы за хворага караля”. Сапраўды, здароўе — самае каштоўнае багацце. Але ці заўсёды мы беражэм яго? Ці карыстаемся спаўна самымі галоўнымі медыкаментамі: “чыстым паветрам, халоднай вадой, пілой і сякерай”, пра якія згадваў у свой час, заўважце, — мастак В. Паленаў?

Каб звярнуць увагу насельніцтва на прафілактычныя мерапрыемствы, стымуляваць жаданне чалавека ў першую чаргу самому клапаціцца аб сваім здароўі, у вобласці, у тым ліку і ў нашым раёне, з 10 чэрвеня па 10 верасня гэтага года праводзіцца акцыя “Брэстчына за здаровы лад жыцця”. З улікам гэтага на Ганцаўшчыне распрацаваны комплекс мерапрыемстваў, накіраваных на фарміраванне ў насельніцтва здаровага ладу жыцця. На працягу гэтага перыяду ў рамках міжнародных і рэспубліканскіх дзён здароўя пройдуць інфармацыйна-адукацыйныя акцыі, арганізатарамі якіх будуць спецыялісты райбальніцы, аддзела адукацыі, спорту і турызму райвыканкама, аддзел ідэалагічнай работы, культуры і па справах моладзі райвыканкама, раённы цэнтр гігіены і эпідэміялогіі.

У час запланаваных сустрэч  з працоўнымі калектывамі па тэматыцы здаровага ладу жыцця будзе весціся гаворка аб прафілактыцы такіх фактараў рызыкі, як фізічная інертнасць, незбалансаванае харчаванне, ужыванне тытуню, алкаголю. У аздараўленчых лагерах для дзяцей будуць праведзены інфармацыйна-адукацыйныя, фізкультурна-аздараўленчыя і культурна-масавыя мерапрыемствы (урокі здароўя, конкурсы і выставы малюнкаў, спартыўныя мерапрыемствы, тэматычныя вечары, дыскатэкі, віктарыны). Пройдуць турыстычныя паходы з удзелам пажылых грамадзян і маладых інвалідаў, актывізуецца работа стадыёнаў, плануецца арганізаваць на базе гандлёвых прадпрыемстваў інфармацыі для насельніцтва аб карысных для здароўя прадуктах, рэцэптуры прыгатавання страў з іх дэгустацыяй і многае іншае. У ліпені мяркуецца правесці раённы спартыўны велапрабег пад дэвізам “Здароўю — так!”, а ў жніўні — раённую спартакіяду сярод сельскіх жыхароў пад дэвізам “Рух — надзейны гарант добрага здароўя і даўгалецця”.

Верыцца, што ў акцыі прымуць удзел усе, хто хоча быць здаровым. І павядуць за сабой тых, хто не захоўвае здаровага ладу жыцця.

Анастасія ШАПЯЛЕВІЧ, фельчар-валеолаг раённага цэнтра гігіены і эпідэміялогіі.