У добры шлях, выпускнікі!

Учарашнія адзінаццацікласнікі развітваюцца са школьным жыццём. Ужо здадзены школьныя экзамены, а наперадзе ў іх — шырокі прасцяг,  на парозе якога яны ўжо стаяць.

Выпускніца гімназіі г. Ганцавічы Крысціна Рулінская (на здымку), як і іншыя, зараз ужо, былыя адзінаццацікласнікі школ раёна,  сёння разам са сваімі роднымі, сябрамі і настаўнікамі акунецца ва ўрачыстую і шчымліва-кранальную атмасферу раённага выпускнога балю, які распачнецца а 17 гадзіне на гарадской плошчы.

Перад Крысцінай — выдатнай вучаніцай і актыўнай удзельніцай грамадскага жыцця, пераможцай раённай алімпіяды па англійскай мове і шматлікіх творчых конкурсаў, стаіць пытанне выбару прафесіі. “Безумоўна, вельмі шкада развітвацца са школай, настаўнікамі і сябрамі — гэты час незабыўны, напоўнены радасцю жыцця і плённай працай у спасціганні таямніц ведаў, — шчыра дзеліцца сваімі думкамі дзяўчына. — Дзякуючы настаўнікам і родным, ёсць неацэнны багаж ведаў, які застаецца са мною і дасць магчымасць годна ісці па жыцці, дасягнуць пастаўленай мэты…”. Крысціна марыць паступіць у Беларускі дзяржаўны ўніверсітэт і вучыцца на эканаміста. Пажадаем жа ёй і ўсім выпускнікам школ раёна паспеху, удачы і спаўнення ўсіх мар.

Фота Аляксея Грушэвіча.

Дарагія выпускнікі!

Прыміце сардэчныя віншаванні з нагоды заканчэння школы і паспяховай здачы выпускных экзаменаў.

Сёння вы прадстаўляеце тых, хто праз некаторы час будзе забяспечваць стабільнае развіццё і росквіт нашай дзяржавы. З вамі звязаны і самыя лепшыя надзеі аб перспектывах развіцця роднай Ганцаўшчыны.

Будучае ў многім залежыць ад тых ведаў, уменняў і навыкаў, якія вы атрымаеце ў вышэйшых, сярэдніх спецыяльных і прафесійна-тэхнічных навучальных установах. Толькі граматныя, энергічныя, прафесійныя кадры могуць вырашыць важныя сацыяльна-эканамічныя задачы, якія стаяць перад краінай.

Спадзяёмся, што выпускнікі 2014 года змогуць знайсці дастойнае месца ў жыцці, у поўнай меры раскрыць свае здольнасці, прынесці найбольшую карысць грамадству.

Няхай заўсёды вам спадарожнічае поспех і ўдача, збываюцца вашы планы і жаданні! Здароўя вам, упэўненасці ў сабе, творчых пошукаў і адкрыццяў, мірнага неба, шчаслівага жыцця на нашай роднай зямлі!

У добры шлях, дарагія выпускнікі!

Раённы выканаўчы камітэт.

Раённы Савет дэпутатаў.