Для абітурыентаў — роўныя правы

Для прадастаўлення грамадзянам роўных магчымасцей пры паступленні ва ўстановы адукацыі ў 2014 годзе, якія рэалізуюць адукацыйныя праграмы вышэйшай і сярэдняй спецыяльнай  адукацыі, і кантролю за падрыхтоўкай і правядзеннем уступных экзаменаў Указам Прэзідэнта Рэспублікі Беларусь ад 16 мая 2014 года № 223 “Аб арганізацыі ўступнай кампаніі ва ўстановах адукацыі ў 2014 годзе” створана дзяржаўная камісія і вызначаны яе паўнамоцтвы.

Ад Брэсцкай вобласці членамі дзяржкамісіі з’яўляюцца памочнік Прэзідэнта Рэспублікі Беларусь — галоўны інспектар па Брэсцкай вобласці Д. Д. Гобараў, старшыня Камітэта дзяржаўнага кантролю вобласці Д. В. Баско і намеснік старшыні Брэсцкага аблвыканкама Л. А. Цупрык.

Штогадовае стварэнне Прэзідэнтам Рэспублікі Беларусь дзяржаўнай камісіі з’яўляецца паказчыкам адносін дзяржавы да адукацыйнага, інтэлектуальнага, навуковага патэнцыялу краіны.

Кіраўнік дзяржавы ўсклаў на Камітэт дзяржкантролю арганізацыйна-тэхнічнае забеспячэнне дзейнасці дзяржаўнай камісіі, на Міністэрства адукацыі — інфармацыйна-метадычнае забеспячэнне ўступнай кампаніі.

На кіраўнікоў рэспубліканскіх органаў дзяржаўнага ўпраўлення, іншых арганізацый, якія маюць у сваім падпарадкаванні ўстановы вышэйшай і (або) сярэдняй спецыяльнай адукацыі, ускладзена персанальная адказнасць за захаванне заканадаўства пры падрыхтоўцы і правядзенні ў іх уступных экзаменаў і залічэнні ў гэтыя ўстановы адукацыі абітурыентаў.

Для забеспячэння выканання даручэння кіраўніка дзяржавы на тэрыторыі Брэсцкай вобласці ў бліжэйшы час будуць створаны абласная камісія па кантролі за ходам падрыхтоўкі і правядзення ўступных экзаменаў, а таксама камісіі па кантролі за ходам падрыхтоўкі і правядзення ўступных экзаменаў ва ўстановах адукацыі вобласці. Адной з задач гэтых камісій з’яўляецца забеспячэнне захавання заканадаўства пры арганізацыі, правядзенні ўступных экзаменаў і залічэнні абітурыентаў у кожнай установе адукацыі.

Як і ў папярэднія гады, у Камітэце дзяржкантролю Брэсцкай вобласці для зваротаў грамадзян па пытаннях уступнай кампаніі будзе арганізавана “гарачая тэлефонная лінія”.