Змяніць адносіны да прыроды

“Саюзная ўборка” — пад такой назвай, як мы паведамлялі (“СП” за 31 мая 2014 года), 5 чэрвеня пройдзе акцыя па навядзенні парадку і добраўпарадкаванні тэрыторый, у якой удзельнічаюць разам тры саюзныя дзяржавы: Беларусь, Расія і Казахстан. На Ганцаўшчыне з гэтай нагоды запланаваны шэраг мерапрыемстваў. 

Штогадовае святкаванне Дня аховы навакольнага асяроддзя дае магчымасць прыцягнуць увагу грамадскасці да праблем навакольнага асяроддзя і падкрэслівае вострую неабходнасць у змяненні адносін чалавека да прыродных рэсурсаў. Менавіта на гэтым і акцэнтуюць увагу супрацоўнікі раённай інспекцыі прыродных рэсурсаў і аховы навакольнага асяроддзя. “Усё залежыць ад нас саміх, — адзначае начальнік інспекцыі Юрый Шапель, — нашых адносін да прыроды. Што зберажом для нашчадкаў, што пакінем ім у спадчыну? Горы смецця, забружаныя лясы і вадаёмы, ці ўсё ж захаваем непаўторную прыгажосць і чысціню нашага краю?

І тут усё пачынаецца з малога. Не толькі куды чалавек выкінуў тое ж смецце, але і як гэта зрабіў. Мы забываем, што амаль палова бытавых адходаў прыпадае на другасную сыравіну — паперу, пластык, шклобой. Некаторыя з гэтых другасных матэрыяльных рэсурсаў могуць знаходзіцца ў зямлі стагоддзямі, а, між іншым, пасля перапрацоўкі маглі б далей паслужыць людзям. Таму варта раздзяляць другасную сыравіну, тым больш, што яе ёсць куды здаваць і ў дадатак можна атрымаць грошы”.

Каб прыцягуць увагу да праблемы збору другаснай сыравіны ідзе размова пра навядзенне парадку на зямлі з адначасовым правядзеннем акцыі па зборы другаснай сыравіны.

У сваю чаргу галоўны спецыяліст інспекцыі Сяргей Іокіш упэўнены, што такія акцыі павінны стаць пастаяннымі. “У нас вялікая ўвага ўдзяляецца добраўпарадкаванню, але наводзячы парадак на зямлі людзі, часцей за ўсё, не абцяжарваюць сябе думкамі аб неабходнасці раздзелу смецця і проста вывозяць яго на звалкі, а разам з ім і другасную сыравіну, — заўважае ён. —  Гэта недапушчальна! Збор другасных матэрыяльных рэсурсаў павінен стаць нормай для ўсіх”.

У чацвер ёсць магчымасць не на словах, а на справе паказаць свае нераўнадушныя адносіны на роднага краю. Так, як гэта штодзённа робяць супрацоўнікі раённай інспекцыі прыродных рэсурсаў і аховы навакольнага асяроддзя. У сваё прафесійнае свята, — Дзень аховы навакольнага асяроддзя, аб’яўлены Указам Прэзідэнта краіны № 35 ад 2 лютага 2000 года, вартавыя прыроды шчыраваць, як і ў іншыя дні, дзеля захавання і прымнажэння нашай прыроднай спадчыны.

Аляксей Грушэвіч.

Фота аўтара.