В районной больнице открылось новое детское отделение

У цэнтральнай раённай бальніцы пасля рэканструкцыі адчыніліся дзверы абноўленага дзіцячага аддзялення на 25 месцаў. Сімвалічна, што ўрачыстае адкрыццё адбылося менавіта ў Міжнародны дзень абароны дзяцей — 1 чэрвеня.

Падзея адметная для ўсяго раёна. У бальніцы створаны па-сапраўднаму выдатныя ўмовы для   маленькіх пацыентаў і работы медперсаналу. Праект рэалізоўваўся пры непасрэднай падтрымцы губернатара вобласці Канстанціна Сумара. На стварэнне, па сутнасці, новага дзіцячага аддзялення затрачана 2,5 мільярда рублёў з раённага і абласнога бюджэтаў. Як адзначыў у сваёй прамове перад урачыстым адкрыццём аддзялення кіраўнік раёна Аляксандр Саланевіч, вялікая заслуга ў рэалізацыі праекта ўсяго калектыву медыцынскіх работнікаў і асабліва галоўнага ўрача Вадзіма Сашко. Асобныя словы ўдзячнасці гучалі і ў адрас прадпрыемстваў і арганізацый Ганцаўшчыны, а таксама мясцовых прадпрымальнікаў, якія закупілі для аддзялення рознага абсталявання і мэблі больш чым на 50 мільёнаў рублёў.

Сапраўды, да высакароднай справы далучыліся многія ганцаўчане. У размове галоўны ўрач УАЗ “Ганцавіцкая ЦРБ” Вадзім Сашко выказаў удзячнасць за падтрымку работнікам раённай пракуратуры, кіраўнікам прадпрыемстваў: Аляксею Крупенічу (лясгас), Аляксею Галяку (жыллёва-камунальная гаспадарка), Міхаілу Пракопчыку (камбінат панэльнага домабудавання), Алегу Дайліду (ДРБУ-100), прадпрымальнікам — Віталю Шамрыле, Генадзю Шаруку, Сяргею Рабцэвічу, Валерыю Муху, Юрыю Пішчу, Сяргею Малышаву, Аляксандру Сакалову, Мікалаю Лойку, Дзмітрыю Іванову і Мікалаю Вінніку. Гэта яшчэ раз сведчыць, што сумеснымі намаганнямі магчыма вырашэнне любых сацыяльна значных пытанняў.

Пасля ўрачыстага пераразання чырвонай стужкі кіраўніком раёна, галоўным урачом бальніцы і раённым урачом-педыятрам Аляксандрам Лагодзічам прысутныя пазнаёміліся з абноўленым, утульным дзіцячым аддзяленнем, сцены якога з густам аздоблены малюнкамі мясцовага мастака Івана Караленкі, наведаліся ў камфортныя палаты з новай мэбляй, па-гаспадарску абуладкаваныя іншыя памяшканні — зручна і камфортна. Так і павінна быць.

Дарэчы, на гэтым работы па абнаўленні ўстаноў аховы здароўя раёна не спыняцца. Да 1 верасня плануецца правесці рэканструкцыю ФАПа ў Вялікіх Круговічах.

Аляксей ГРУШЭВІЧ.