Работа суб’ектаў малога прадпрымальніцтва

На 1 студзеня 2014 года на Ганцаўшчыне налічвалася 134 суб’екты малога прадпрымальніцтва (1,2 працэнта ад агульнай колькасці па вобласці), у тым ліку 118 мікраарганізацый і 16 малых арганізацый. Вытворчую дзейнасць у 2013 годзе ажыццяўлялі 106 мікраарганізацый і ўсе малыя арганізацыі1.

З агульнай колькасці летась 94 працэнты складалі арганізацыі з прыватнай формай уласнасці.

Найбольшая колькасць суб’ектаў малога прадпрымальніцтва ў 2013 годзе была задзейнічана ў гандлі — 35,1 працэнта, прамысловасці — 23. А таксама займаліся транспартам і сувяззю — 17,2 працэнта.

Спісачная колькасць работнікаў такіх арганізацый у сярэднім за год склала 1 тысячу чалавек, а сярэдняя колькасць знешніх сумяшчальнікаў і работнікаў, якія выконвалі работу па грамадзянска-прававых дагаворах, — 98 чалавек.

Намінальная налічаная сярэднямесячная заработная плата работнікаў малога бізнесу за 2013 год склала 3805,5 тысячы рублёў і ў параўнанні з папярэднім годам узрасла на 55,7 працэнта. У мікраарганізацыях яна склала 3494,9 тысячы рублёў, у малых арганізацыях — 4068,4 тысячы рублёў.

Па выніках фінансава-гаспадарчай дзейнасці арганізацыямі атрымана выручка ад рэалізацыі тавараў, прадукцыі, работ і паслуг на агульную суму 365,3 мільярда рублёў, што на 26 працэнтаў больш, чым у 2012 годзе. Чысты прыбытак павялічыўся на 29,4 працэнта і склаў 28,2 мільярда рублёў.

Узровень рэнтабельнасці суб’ектаў малога прадпрымальніцтва ў мінулым годзе ў цэлым па раёне склаў 12,4 працэнта, што на 1,5 працэнта вышэй, чым пазалетась.

Дарэчы, удзельная вага стратных прадпрыемстваў малога бізнесу ў параўнанні з 2012 годам павялічылася на адзін працэнт і склала 10,7 працэнта ад агульнай іх колькасці.

Галоўнае статыстычнае ўпраўленне Брэсцкай вобласці.

1. Мікраарганізацыя — зарэгістраваныя ў Рэспубліцы Беларусь камерцыйныя арганізацыі з сярэдняй колькасцю работнікаў за каляндарны год да 15 чалавек уключна;

малая арганізацыя — зарэгістраваныя ў Рэспубліцы Беларусь камерцыйныя арганізацыі з сярэдняй колькасцю работнікаў за каляндарны год ад 16 да 100 чалавек уключна.