Заззяла вясёлка на клумбах

І ўсё-такі дзівосная, раскошная пара года — вясна! Апранаюцца ў маладую зеляніну дрэўцы і лугі, квітнеюць сады, красуюць цюльпаны — вестуны майскіх свят.

У такі цудоўны жыватворны час асабліва прыкмячаеш, як добраўпарадкоўваецца, прыгажэе, маладзее наш горад. А для гэтага робіцца многае: рабочыя камунальнай службы ўтрымліваюць у чысціні і парадку вуліцы, садзяць уздоўж іх дрэўцы. А літаральна днямі на клумбах, разбітых на плошчы, уздоўж вуліцы Чайкоўскага, на ўездзе ў райцэнтр і ў іншых месцах горада заззяла шматколерная кветкавая вясёлка: яе “перасялілі” на зямлю рабочыя РЖКГ, якія займаюцца добраўпарадкаваннем і азеляненнем нашага горада. Таццяна Каркотка, Аксана Чамаран, Аксана Каркотка пад кіраўніцтвам майстра па ўтрыманні зялёных насаджэнняў Кацярыны Ярашэвіч высаджваюць з цяпліцы ў грунт расаду кветак, вырашчаную сёлета ўжо ў новай прасторнай цяпліцы. І хоць працуюць гэтыя маладыя жанчыны нядаўна, падыходзяць да сваёй справы творча, з фантазіяй і густам. Вяргіні, бальзаміны, цэлозія, бегонія, петунія, цынерарыя і іншыя кветкі, асобныя з якіх ужо цвітуць, на клумбах ператвараюцца ў яркіх матылькоў, у незвычайныя геаметрычныя фігуры. Нельга не залюбавацца імі, калі праходзіш міма такой прыгажосці, і пераконваешся ў мудрасці і праўдзівасці сказанай кімсьці з вялікіх ісціны: прыгажосць — ключ да людскіх сэрцаў.

Вось толькі шкада, што не ўсе цэняць карпатлівую работу спецыялістаў камунальнай службы: могуць бяздушна прайсціся па газонах і пад падэшвамі абутку гіне безабаронная раслінка. Ёсць такія, што ўпотай крадуць высаджаную расаду для ўласных кветнікаў. І гэта моцна засмучае рабочых, якія так карпатліва, як немаўлят, гадавалі-песцілі далікатныя ўсходы. “Нават з трывала замацаванымі вазонамі выдзіраюць”, — абураліся Аксана Каркотка і Аксана Чамаран, высаджваючы ў панядзелак расаду на клумбе насупраць гасцініцы (на здымку). Дарэчы, як і тыя, што не клапоцяцца аб тым, каб каля іх дамоў і фірм таксама было ўтульна і прыгожа.

Напрыклад, каля гандлёвых цэнтраў, што знаходзяцца каля гарадской паліклінікі, добраўпарадкаваннем асабліва і не займаюцца. Тэрыторыя засмечана і выклікае сумнае ўражанне.

Уласн. інф.