Уся справа ў трубе

 Летась у жыхароў шматпавярховых дамоў мікрараёна Будаўнікоў у райцэнтры было шмат нараканняў на смурод, які часта стаяў у паветры з-за пастаянных парываў каналізацыі. Аб гэтай праблеме “СП” неаднаразова пісала. Якое ж выйсце са склаўшайся сітуацыі?

Па каментарый мы звярнуліся да галоўнага інжынера раённай жыллёва-камунальнай гаспадаркі Васіля Жалезнага. Ён адзначыў, што каналізацыйны калектар, які цягнецца з вуліцы Кастрычніцкай праз мікрараён Будаўнікоў, будаваўся яшчэ ў 60-я гады мінулага стагоддзя і на сённяшні дзень мае 100-працэнтную зношанасць. Ліквідацыя частых парываў стала галаўным болем для камунальнікаў, бо глыбіня пралягання каналізацыйнага калектара іншы раз дасягае 6 метраў і на такіх участках для яго рамонту патрабавалася спецыяльная тэхніка, якой у раёне проста няма. Сур’ёзна ўскладняюць рамонтныя работы і грунтавыя воды, што ў нашым рэгіёне стаяць даволі высока. Але, варта адзначыць, што работнікі РЖКГ не толькі займаліся залатваннем дзірак. Ведаючы аб гэтай праблеме, яшчэ ў 2009 годзе быў распрацаваны праект па замене каналізацыйнага калектара. Яго прыйшлося дапрацаваць, з улікам павелічэння нагрузкі за кошт новых шматпавярховых дамоў, пабудаваных па вуліцы Кастрычніцкай. Таму зараз прадугледжана і будаўніцтва новай каналізацыйна-помпавай станцыі.

Работы па замене самога калектара вяліся ўжо ў 2013 годзе — яго пракладзена 320 метраў. Сёлета для канчатковага вырашэння праблемы з абласнога бюджэту выдзяляюцца сродкі, і ў другім квартале каналізацыйны калектар будзе поўнасцю заменены. Паралельна будуць праводзіцца работы па будаўніцтву і КПС. Агульны кошт рэканструкцыі сістэмы каналізацыі на згаданым участку — пракладка новага каналізацыйнага калектара і ўзвядзенне каналізацыйна-помпавай станцыі — каля 3 мільярдаў рублёў.