Матацыкліст, будзь асцярожны!

З прыходам цяпла на дарогах з’явіліся ўжо аматары хуткай язды на матацыклах. Як паказвае практыка, яны якраз і ствараюць сур’ёзныя праблемы па бяспецы руху. Толькі ў мінулым годзе на Ганцаўшчыне адбылося 3 дарожна-транспартныя здарэнні з удзелам матацыклістаў, у якіх атрымалі раненні 3 чалавекі.

Матацыкл хаця і хуткі, але вельмі няўстойлівы транспартны сродак, прычым, як вадзіцель, так і пасажыр практычна не абаронены, што ў шмат разоў павялічвае цяжар наступстваў пры ДТЗ. Як правіла, аварыі з удзелам матацыклістаў адбываюцца ў вячэрні ці начны час з-за грубага ігнаравання імі правілаў дарожнага руху. У асноўным гэта незахоўванне хуткасных рэжымаў, а таксама кіраванне транспартам асобамі, якія не маюць на гэта права.

Так, летась 17 ліпеня ў вёсцы Палонь Андрэй Кісялевіч на матацыкле трапіў у аварыю і атрымаў цялесныя пашкоджанні, сутыкнуўшыся з аўтамабілем “ВАЗ”, калі яго вадзіцель рухаўся ў спадарожным накірунку і спрабаваў спыніць машыну на левай абочыне дарогі. 

Літаральна праз месяц жыхар вёскі Люсіна Уладзімір Кралівец, не маючы права кіравання матацыклам, на “Чызеце” урэзаўся ў апору ЛЭП, зляцеўшы з дарогі ў выніку няправільна выбранага хуткаснага рэжыму. А ў кастрычніку Аляксандр Дайлід з Будчы ў роднай вёсцы на матацыкле трапіў у аварыю — сутыкнуўся з аўтамабілем, які выязджаў з другараднай дарогі на галоўную. 

Асаблівай увагі патрабуюць падлеткі-матацыклісты. Паважаныя бацькі! Цікаўцеся, чым займаюцца вашы дзеці вечарамі і не давайце ім карыстацца матацыкламі, калі на гэта няма дазволу. Калі ён ёсць, то абавязкова нагадайце, што пры кіраванні матацыклам неабходна быць асабліва ўважлівым і асцярожна карыстацца хуткаснымі магчымасцямі такога транспартнага сродку. Звяртайце ўвагу на яго тэхнічны стан і своечасовае праходжанне тэхнічнага агляду. Не дазваляйце катацца ў начны час. Таксама памятайце, што перавозка дзяцей да 12 гадоў на заднім сядзенні матацыкла забаронена.

Кіраваць матацыклам дазваляецца з 16 гадоў і пры наяўнасці вадзіцельскага пасведчання з адпаведнай катэгорыяй: А1 — рабочы аб’ём рухавіка да 125 кубічных сантыметраў (матацыкл “Мінск”), і А — матацыклы з рабочым аб’ёмам рухавіка больш за 125 кубічных сантыметраў.

Абавязкова нагадвайце надзяваць моташлем — ён дазваляе значна знізіць цяжкасць цялесных пашкоджанняў пры ДТЗ. Памятайце, ваш уласны прыклад мае вялікае значэнне пры выхаванні ў дзяцей свядомых паводзін на вуліцы.

Паважаныя матацыклісты! Строга прытрымлівайцеся правілаў дарожнага руху! Гэта гарантыя вашай бяспекі. Памятайце: жыццё і здароўе даражэй за сэканомлены час. Матацыкл набываецца не для таго, каб вы на ім загінулі ці сталі інвалідам. Выдатны вадзіцель заўсёды ўважлівы, і ў яго ёсць час для ацэнкі дарожнай сітуацыі і выканання неабходных дзеянняў па забеспячэнні бяспекі дарожнага руху.

Вячаслаў ГУЛІЦКІ, начальнік аддзялення ДАІ РАУС.