Любіць прыроду — любіць Радзіму

Ёмістае слова — прырода! Для чалавека — гэта зямля, дзе жылі яго продкі, дзе жыў і жыве яго народ. Любоў да роднай краіны немагчыма без любові да прыроды. Невыпадкова словы “радзіма”, “прырода”, “народ” маюць агульную частку “род”. Любоў да роднага, прыроды — натуральнае пачуццё, выхаванае ў многіх з самага ранняга дзяцінства. Старажытная мудрасць абвяшчае: “Кожны чалавек можа лічыць пражытае жыццё дарэмным, калі ён не выхаваў ні аднаго дзіцяці, не пабудаваў ні аднаго дома, не вырасціў ні аднаго дрэва”.

Мы, работнікі дзіцячага сада аграгарадка Раздзялавічы, з упэўненасцю сцвярджаем, што чалавек, які калісьці ў дзяцінстве пасадзіў дрэва, ужо не стане яго ламаць, які зрабіў домік для птушак — ніколі не заб’е іх з рагаткі, які змагаўся з пажарам — не кіне запалку ў лесе, не пакіне непатушаны агонь і іншаму не дазволіць. Па нашым глыбокім перакананні, дзеці з ранняга ўзросту павінны разумець, што лёс прыроды — у іх руках, у іх свядомасці, сумленні, у іх адносінах да яе. Таму педагагічны калектыў дашкольнай установы праводзіць у гэтым накірунку велізарную работу і вучыць дзяцей, што любіць, берагчы прыроду — абавязак кожнага.

Выкарыстоўваючы розныя выхаваўчыя заняткі, гульнявыя моманты, праводзячы гутаркі, рабяты вучацца трапятліва ставіцца да ўсяго жывога. Так, у кожным дзіцячым сэрцы болем адгукнуліся словы П. Гвездаслава: “Я сарваў кветку — і яна завяла, злавіў жука — і ён памёр у мяне на далоні. І тады я зразумеў, што дакрануцца да прыгажосці можна толькі сэрцам”. Людзі нездарма кажуць, што зламаць дрэва — зламаць сабе лёс. У нас ні адно дзіця, якое з дарослымі пасадзіла дрэва, не сарве ні галінкі, ні лісточка.

Праца па экалагічным выхаванні асабліва актывізавалася вясной. Трэба было бачыць, з якім энтузіязмам падключыліся бацькі са сваімі дзецьмі да правядзення акцыі “Дапаможам птушкам-сябрам”. З асаблівай любоўю і стараннем яны  майстравалі домікі для птушак. А колькі шчасця, задавальнення і асалоды свяцілася ў вачах малых, калі яны разам з дарослымі развешвалі шпакоўні!

Цяпер рабяты з асаблівай цікавасцю будуць назіраць за жыццём птушак. Наперадзе іх чакаюць новыя цікавыя і карысныя заняткі па экалагічным выхаванні, новыя акцыі.  Думаем, хлопчыкі і дзяўчынкі выдатна з імі справяцца.

Жанна Рабцэвіч,

загадчык

ДУА “Яслі-сад №11 в. Раздзялавічы”. 

НА ЗДЫМКУ: падчас развешвання домікаў для птушак.