Дзень ваенных камісарыятаў

8 красавіка ва Ўзброеных Сілах адзначаецца Дзень ваенных камісарыятаў Рэспублікі Беларусь (Дзень мясцовых органаў ваеннага кіравання).

Суровым выпрабаваннем для ваенных камісарыятаў і практычна праверкай дзейнасці распрацаванай сістэмы мабілізацыйных мерапрыемстваў стала Вялікая Айчынная вайна.

У сціслыя тэрміны, у цяжкіх умовах вайны ваеннымі камісарыятамі была мабілізавана і адпраўлена ў войскі вялікая колькасць ваеннаабавязаных, падрыхтаваны сотні тысяч байцоў. Ваенныя камісарыяты прымалі непасрэдны ўдзел у забеспячэнні абароны многіх гарадоў.

Гісторыя Ганцавіцкага раённага ваеннага камісарыята пачынаецца з 6 ліпеня 1944 года.

У пасляваенны перыяд ваенныя камісарыяты выконвалі вялікую работу па своечасовым прыёме на воінскі ўлік ваеннаслужачых пасля дэмабілізацыі, па іх працоўным і бытавым ўладкаванні. І вось ужо больш за 90 гадоў яны ўносяць дастойны ўклад у рашэнне важнейшых дзяржаўных задач.

Ганцавіцкі ваенны камісарыят, як і іншыя, з’яўляецца выканаўцам задач абароннага характару. Ва ўзаемадзеянні з раённым выканаўчым камітэтам распрацоўвае планы правядзення мабілізацыі людскіх і транспартных рэсурсаў на тэрыторыі раёна на ваенны час. Адсюль — цэлы комплекс важных задач: арганізацыя воінскага ўліку, браніраванне рабочых і служачых за прадпрыемствамі ў інтарэсах Узброеных Сіл, іншых войскаў і воінскіх фарміраванняў краіны, прызыў грамадзян на тэрміновую ваенную службу і службу ў рэзерве, арганізацыя тэрытарыяльнай абароны, работа па пытаннях сацыяльнай і прававой абароны ваеннаслужачых, грамадзян, якія звольнены з ваеннай службы, і членаў іх сямей.

Акрамя гэтага, ваенныя камісарыяты ажыццяўляюць адбор кандыдатаў для паступлення ў ваенныя вучэбныя ўстановы, прымаюць непасрэдны ўдзел у ваенна-патрыятычным выхаванні моладзі, сацыяльным забеспячэнні ваеннаслужачых запасу і вырашаюць многія іншыя важныя пытанні.

З 2004 года аднавіліся планавыя ваенныя зборы па падрыхтоўцы ваеннаабавязаных запасу па неабходных спецыяльнасцях, а з 2005-га — па абслугоўванні ўзбраення і ваеннай тэхнікі.

З гэтага часу практычна штогод ваеннымі камісарыятамі, у тым ліку і нашым, прызываецца пэўная колькасць ваеннаабавязаных на разнастайныя віды ваенных збораў з прыцягненнем транспартных сродкаў дзяржаўных органаў і арганізацый. Ваеннаабавязаныя з нашага раёна пры праходжанні ваенных збораў з вялікай адказнасцю аднаўляюць свае навыкі карыстання зброяй і тэхнікай.

Набліжаецца значная падзея ў гісторыі нашай дзяржавы — 70-годдзе вызвалення Беларусі ад нямецка-фашысцкіх захопнікаў. Гэтае свята заваявана самаадданасцю нашых ветэранаў. З набліжэннем знамянальнай даты яшчэ больш актывізуюць сваю дзейнасць грамадскія арганізацыі, якія займаюцца патрыятычным выхаваннем моладзі. Правядзенне ў школах урокаў мужнасці, сустрэч з ветэранамі, курсантамі ваенных вучэбных устаноў садзейнічае ўмацаванню ўпэўненасці юных грамадзян у тым, што яны разам з дарослымі маюць непасрэдныя адносіны да абароны Айчыны.

Да знамянальнай даты Прэзідэнтам краіны ўстаноўлены юбілейны медаль “70 год вызвалення Рэспублікі Беларусь ад нямецка-фашысцкіх захопнікаў”. Ваенным камісарыятам сумесна з упраўленнем па працы, занятасці і сацыяльнай абароне райвыканкама будуць уручаны медалі ветэранам Вялікай Айчыннай вайны, былым вязням фашысцкіх канцлагераў, турам, гета і іншых месцаў прымусовага ўтрымання, створаных фашыстамі і іх саюзнакамі ў гады Другой сусветнай вайны.

Больш за 90 гадоў ваенныя камісарыяты арганічна зліты з гісторыяй стварэння і развіцця Узброеных Сіл. Яны ўнеслі і працягваюць уносіць дастойны ўклад у рашэнне важнейшых дзяржаўных задач па забеспячэнні абараназдольнасці Беларусі.

Валерый КАСЯНЮК, ваенны камісар Ганцавіцкага раённага ваеннага камісарыята.