Справядлівасць пакарання

У судовай практыцы нярэдка здараюцца выпадкі, калі падсудныя не задаволены рашэннем суда і абскарджваюць яго ў вышэйшай інстанцыі. У той жа час бывае, што і пракуратура застаецца незадаволенай вынесеным вердыктам, і тады  ў судовую калегію па крымінальных справах выносіцца касацыйны пратэст на рашэнне суда.

Так адбылося і ў справе гараджанкі Алены Штанюк. Яна пасля сумеснага распіцця спіртнога са сваім сужыцелем ударыла яго кухонным нажом у жывот і тым самым нанесла чалавеку цяжкія цялесныя пашкоджанні. На судзе жанчына прызнала сваю віну часткова і сказала, што сужыцель сам наскочыў на нож. А той памяняў дадзеныя падчас следства паказанні і стаў прытрымлівацца на судзе версіі падсуднай, каб дапамагчы ёй пазбегнуць справядлівага пакарання. І хаця суд палічыў вінаватасць Штанюк ва ўмысным нанясенні цяжкіх цялесных пашкоджанняў поўнасцю даказанай, але назначыў ёй даволі мяккае пакаранне — 5 гадоў абмежавання свабоды без накіравання ў папраўчую ўстанову адкрытага тыпу.

Пракуратура прынцыпова не была згодна з такім рашэннем суда. Ён не ўлічыў тое, што абвінавачваная не мела пастаяннага месца работы, працяглы час пражывала ў доме пацярпелага без рэгістрацыі, уладкоўвацца на работу не збіралася і жыла за кошт выпадковых заробкаў і сродкаў сужыцеля, а таксама злоўжывала спіртным. Больш таго, яна праходзіла лячэнне ад хранічнага алкагалізму ў псіхіятрычнай бальніцы “Крывошын”, па заключэнні эксперта пакутуе ад “сіндрому залежнасці ад алкагалізму (хранічнага алкагалізму)” і мае патрэбу ў прымяненні прымусовых мер бяспекі і лячэння. Пры гэтым супрацьпаказанняў да такога лячэння не мае.

У здзяйсненні злачынства Штанюк не раскаялася, аб чым сведчыць той факт, што жанчына неаднаразова мяняла свае паказанні, да здзяйснення злачынства і пасля ўжывала спіртныя напіткі, ніякай медыцынскай даўрачэбнай дапамогі пацярпеламу не аказала і нават не паведаміла аб нанесеным раненні ва ўстанову аховы здароўя. Акрамя таго, яна спрабавала схаваць сляды злачынства.

Вельмі важна і тое, што Штанюк схільна да праяўлення насілля і агрэсіі ў стане алкагольнага ап’янення — яна ўжо асуджалася за аналагічнае злачынства (абварыла кіпятком свайго ранейшага сужыцеля).

Пры такіх абставінах дасягненне мэты крымінальнай адказнасці — выпраўленне Штанюк, прадухіленне здзяйснення новых злачынстваў асуджанай — магчыма выключна шляхам яе ізаляцыі ў месцах пазбаўлення свабоды.

Таму і быў пададзены касацыйны пратэст у судовую калегію па крымінальных справах Брэсцкага абласнога суда. У адпаведнасці з яе рашэннем Алене Штанюк назначана пакаранне ў выглядзе пазбаўлення свабоды ў папраўчай калоніі ва ўмовах агульнага рэжыму тэрмінам на 4 гады.

Сяргей НАСЕНЯ, пракурор Ганцавіцкага раёна.