Слаўны пройдзены салдатам шлях

95-годдзе з дня нараджэння сустрэў ветэран Вялікай Айчыннай вайны Іван Мартынавіч Качан.

Слаўны салдацкі шлях пройдзены гэтым чалавекам. Нарадзіўся Іван Мартынавіч 21 сакавіка 1919 года ў вёсцы Востраў Капыльскага раёна Мінскай вобласці. Сваю працоўную дзейнасць ён пачаў з 16 гадоў паляводам у родным калгасе. У 1939 годзе юнак быў закліканы ў рады Чырвонай Арміі і накіраваны ў палкавую школу малодшых камандзіраў у горад Арол.

Калі пачалася вайна, першае баявое хрышчэнне салдат прыняў пад Смаленскам. Быў ён тады ў званні малодшага камандзіра аддзялення. У лістападзе 1941 года разам з аднапалчанамі займаў абарону пад Арлом і быў паранены. Пасля выздараўлення ўдзельнічаў у баях на Курскай дузе, у наступальных аперацыях па вызваленні Украіны, у фарсіраванні водных перашкод на рэках Дзясна, Днепр і Прыпяць. Вызваляў ад фашысцкіх заваёўнікаў гарады Кіеў і Роўна, дзе атрымаў цяжкае раненне нагі. А потым зноў былі баі — па вызваленні Польшчы, Чэхаславакіі.

Іван Качан быў смелым, мужным салдатам, пра што сведчаць і яго шматлікія ўзнагароды. За ўдзел у баявых аперацыях у гады Вялікай Айчыннай вайны Іван Мартынавіч узнагароджаны ордэнамі: Чырвонай Зоркі, Славы 3-й ступені, Айчыннай вайны 2-й ступені, двума медалямі “За баявыя заслугі” (у лютым і ў жніўні 1943 года).

Пасля вяртання дамоў восенню 1946 года І. М. Качан працаваў да выхаду на пенсію на розных пасадах у сельскай гаспадарцы. Цяпер ён жыве ў нашым райцэнтры. Мы са спецыялістам райваенкамата Наталляй Рудко наведалі  інваліда Вялікай Айчыннай вайны, шчыра павіншавалі гэтага паважанага чалавека з шаноўным юбілеем, уручылі яму кветкі і сувенір. Дзякуем Вам, дарагі наш юбіляр, за мір і спакой, якія падарыла нам Ваша слаўнае пакаленне. Здароўя Вам і ўсяго самага добрага!

Яўгенія СТАЦЬКО,

старшыня раённага савета ветэранаў.

НА ЗДЫМКУ: ветэран ВАВ Іван Мартынавіч Качан.