Працатэрапія супраць дурману

Штогод у раёне ўзбуджаецца па некалькі крымінальных спраў, звязаных з ужываннем наркотыкаў. Улічваючы ўсю сур’ёзнасць праблемы распаўсюджвання наркаманіі, пракуратура прынцыпова займае пазіцыю па ўзмацненні жорсткасці пры вынясенні судовых рашэнняў па такіх справах.

У свае 20 гадоў жыхар райцэнтра Эдуард Джафараў меў за плячыма сярэднюю спецыяльную адукацыю, але не вельмі імкнуўся працаваць і тым больш удасканальваць свае веды. Больш таго, паспеў атрымаць судзімасць па артыкуле 155 Крымінальнага кодэкса Рэспублікі Беларусь “Прычыненне цяжкага ці меней цяжкага цялеснага пашкоджання па неасцярожнасці”, за што па рашэнні суда вымушаны быў адпрацаваць 100 гадзін на грамадскіх работах. Але такая працатэрапія, відаць, станоўча не паўплывала на маладога чалавека. Цяга да вострых адчуванняў зноў прывяла яго на лаву падсудных.

Позна вечарам, 10 верасня, Эдуарда затрымалі на тэрыторыі СШ № 3 г. Ганцавічы з псіхатропным рэчывам вагой крыху меншай за 1 грам. Ужо дома ў яго знайшлі яшчэ 34 грамы наркотыкаў. Як потым высветлілася, “траўку” з псіхатропам Эдуард набыў некалькі тыдняў назад у Мінску.

Падчас разгляду крымінальнай справы ў судзе аматар “допінгу” поўнасцю прызнаў сваю віну ў незаконным без мэты збыту набыцці, перавозцы і захоўванні псіхатропных рэчываў. Але ўлічваючы, што Джафараў быў раней судзімы і яго судзімасць аказалася не пагашанай і не знятай ва ўстаноўленым заканадаўствам парадку, дзяржаўны абвінаваўца Міхаіл Кляўцэвіч запрасіў назначыць падсуднаму пакаранне, звязанае з абмежаваннем свабоды.

У выніку суд вынес рашэнне назначыць Эдуарду Джафараву 2 гады і 6 месяцаў абмежавання свабоды з накіраваннем у папраўчую ўстанову адкрытага тыпу. А гэта значыць, што яму прыйдзецца гэты час працаваць.

Як пракаменціраваў сваю пазіцыю па гэтай справе Міхаіл Кляўцэвіч, падсудны не зрабіў ніякіх вывадаў, калі ўпершыню быў асуджаны і атрымаў даволі мяккае пакаранне. Больш таго, наўмысна пайшоў на здзяйсненне злачынства. У гэтым выпадку толькі абмежаванне свабоды можа прывесці да прытомнасці злачынцу. Дарэчы, калі ён не супакоіцца, то ўжо ў наступны раз яго чакае папраўчая калонія.

Аляксей ГРУШЭВІЧ.