Уход от перекрестного субсидирования

З 1 студзеня 2014 года на Брэстчыне адышлі ад перакрыжаванага субсідзіравання пры аплаце камунальных паслуг, што дало істотную палёгку прадпрыемствам і арганізацыям, якія цяпер значна менш плацяць за цеплавую энергію, ваду і каналізацыю.

Раней затраты на аказанне насельніцтву камунальных паслуг пакрываліся часткова за кошт саміх людзей, часткова — прадпрыемствамі і арганізацыямі, і ў большай ступені — з бюджэту. Па сутнасці, у цану камунальных паслуг для суб’ектаў гаспадарання закладвалася і пэўная сума затрат, якая ішла на жыццезабеспячэнне насельніцтва.

Адышоўшы ад перакрыжаванага субсідзіравання, затраты на камунальныя паслугі для насельніцтва будуць пакрывацца, як і раней: часткова — самімі людзьмі, астатнюю частку прафінансуе дзяржава.

Для простых грамадзян нічога не зменіцца. Тарыфы для іх застануцца такімі ж і будуць толькі паступова індэксавацца з улікам росту цэн. Цэны на камунальныя паслугі для насельніцтва рэгулююцца дзяржавай і, згодна з Пастановай Савета Міністраў Рэспублікі Беларусь, адзіныя па ўсёй краіне.

Што датычыцца прадпрыемстваў і арганізацый, то цяпер за камунальныя паслугі яны будуць плаціць менш. Сістэма разлікаў абапіраецца на тое, што для камунальнікаў у кожным раёне ўстанаўліваецца свая, у залежнасці ад затрат, планава-разліковая цана на камунальныя паслугі — іх межавы сабекошт. І яны не маюць права падымаць цану вышэй запланаванага. Такім чынам, становіцца празрыстай уся сістэма разлікаў паміж камунальнікамі і іншымі суб’ектамі гаспадарання. У выніку, калі прадпрыемствы і арганізацыі нашага раёна ў 2013 годзе плацілі за 1 кілакалорыю цеплавой энергіі 1 мільён 47 тысяч рублёў, то з 1 студзеня 2014 года — ужо 881 тысячу 500 рублёў.

Напрыклад, ААТ “Модуль” у 2013 годзе за цеплаэнергію заплаціла 1 мільярд 130 мільёнаў рублёў. Пры такім жа аб’ёме спажывання сёлета яна абыдзецца прадпрыемству толькі ў 985 мільёнаў, ці прыкладна на 12 працэнтаў танней.

Такая сістэма разлікаў датычыцца суб’ектаў гаспадарання ўсіх форм уласнасці. Грунтуючыся на зацверджанай Брэсцкім упраўленнем ЖКГ па ўзгадненні з Міністэрствам жыллёва-камунальнай гаспадаркі краіны і аблвыканкамам для Ганцавіцкага раёна планава-разліковай цане на камунальныя паслугі, для арганізацый і прадпрыемстваў  стане таксама істотна таннейшым карыстанне водаправодам і каналізацыяй. Калі раней за кубічны метр вады яны плацілі 9110 рублёў, то з 1 студзеня 2014 года — 7300 рублёў. Каналізацыя цяпер абыдзецца ў 6500 рублёў за кубічны метр замест 16060 рублёў, якія прыходзілася плаціць яшчэ ў 2013 годзе.

Як пракаменціравала адыход ад перакрыжаванага фінансавання камунальных паслуг начальнік планава-эканамічнага аддзела раённай жыллёва-камунальнай гаспадаркі Вера Саланенка, новая сістэма ў разліках ставіць перад камунальнікамі больш жорсткія ўмовы па эфектыўным вядзенні сваёй дзейнасці: скарачэнні затрат на вытворчасць, рацыянальным і граматным выкарыстанні матэрыяльна-тэхнічнай базы, а таксама павышэнні прадукцыйнасці працы.

Аляксей Грушэвіч.