Сустрэча выпускнікоў

Дзіцячую школу мастацтваў за ўсе гады яе існавання скончыла амаль 1000 чалавек, 52 выпускі. На мінулым тыдні, у чацвер, адбылася сустрэча з нядаўнімі, зусім яшчэ маладымі выпускнікамі ДШМ.

Прыехалі пабачыцца з настаўнікамі, прарэкламаваць свае ўстановы, а таксама паказаць, чаму навучыліся выпускнікі ДШМ, якія зараз навучаюцца ў музычных каледжах у розных куточках нашай краіны.

Наталля Калдаева, будучы музыкавед, навучэнка першага курса Гродзенскага музычнага каледжа, са сцэны падзялілася сваімі ўражаннямі ад студэнцкага жыцця. Дзяўчынка расказала аб тых спецыяльнасцях, якія існуюць у каледжы, аб сваіх буднях: “Музыкаведы прачынаюцца а шостай гадзіне раніцы, снедаюць і адразу ж ідуць на заняткі. Восем гадзін у тыдзень у нас займае толькі сальфеджыа, 6 гадзін мы вывучаем музычную літаратуру. Жывём разам з аднагрупнікамі ў добрым інтэрнаце, на кожным паверсе ёсць пакоі для заняткаў, а таксама фартэпіяна. Мне студэнцкае жыццё і вучоба ў каледжы вельмі падабаюцца!”.

Кожны з выпускнікоў паказаў на сцэне свае здольнасці: хто спяваў, хто іграў на гітары, скрыпцы ці на фартэпіяна. Выступленні студэнтаў “разбаўлялі” нумары сённяшніх навучэнцаў ДШМ і іх настаўнікаў.

Напрыканцы некалькі слоў сказаў і дырэктар дзіцячай школы мастацтваў Валерый Марцінкевіч: “Сустрэча з выпускнікамі — для нас заўсёды свята. На сённяшні дзень 16 нашых рабят навучаюцца ў розных музычных установах, але, вядома ж, не ўсе змаглі прыехаць. Мы вельмі рады бачыць вас, слухаць вашы выступленні. Зразумела, калі вы ўпэўнена вырашылі звязаць сваё жыццё з музыкай, то на гэта спатрэбіцца яшчэ доўгі і догі час. Таму што, каб набыць вышэйшую музычную адукацыю, неабходна прайсці ўсе прыступкі: музычную школу, каледж і толькі потым універсітэт. На гэта спатрэбіцца 15 гадоў! Таму, дарагія нашы, я жадаю вам вялікіх поспехаў і вялікіх перамог”.

Аксана МІНІНА.