З любоўю да справы і дзяцей

З любоўю да справы і дзяцей — менавіта так працуе выхавальнік ДУА “Яслі-сад № 7 г. Ганцавічы” Алена Плескацэвіч. А калі педагог спалучае ў сабе любоў і да выбранай прафесіі, і да дзяцей, якіх выхоўвае, ён — дасканалы педагог. І гэта даказаў конкурс прафесійнага майстэрства “Настаўнік года–2013”, што праводзіўся ў нашым раёне. У мінулую сераду на базе ДУА “Яслі-сад № 7 г. Ганцавічы” прайшоў яго заключны этап, падчас якога вызначаўся лепшы з лепшых выхавальнікаў у намінацыі “Дашкольная адукацыя”. Яго фіналістам і стала Алена Плескацэвіч. Яна будзе прадстаўляць сістэму дашкольнай адукацыі нашага раёна ў абласным конкурсе ў Брэсце.

А раённаму конкурсу папярэднічала ўдумлівая падрыхтоўка і карпатлівая работа ўсіх, хто вырашыў прыняць удзел у няпростым і адказным саперніцтве. Хаця, калі шчыра, усе намінанты і без конкурсных мерапрыемстваў сваімі штодзённымі адказнымі адносінамі да непасрэднай работы сцвярджаюць: яны — не выпадковыя людзі ў галіне адукацыі, і справай даказваюць тое, чаму вучаць сваіх выхаванцаў.

Дык хто ж яны, тыя, хто смела панёс свой вопыт работы на суд журы і калег? У гэтай намінацыі прынялі ўдзел, апрача Алены Міхайлаўны, выхавальнікі са стажам Ірына Краўчук (яслі-сад № 2), Галіна Швайка (яслі-сад № 1), настаўнік-дэфектолаг Святлана Янучок (яслі-сад № 4), а таксама маладыя спецыялісты — выхавальнікі Вольга Заяц (яслі-сад № 5) і Алена Саланенка (Любашаўская яслі-сад — пачатковая школа). Яны прадаставілі журы абагульнены вопыт сваёй работы, відэазапісы заняткаў, а таксама прайшлі тэсціраванне, правялі заняткі з выхаванцамі ў незнаёмых групах. А 22 студзеня на базе ясляў-сада № 7 ва ўрачыста-святочнай абстаноўцы прайшлі самапрадстаўленне канкурсантак, абарона вопыту. Іх горача падтрымлівалі калегі, і многія з іх па-новаму адкрывалі для сябе тых, з кім працавалі поплеч, і шчыра радаваліся за сябровак, і ганарыліся імі. А членам журы няпроста было выбраць фіналіста. Адчувалася, што ўсе, хто прыняў удзел у конкурсе, любяць і сваю работу, і дзетак, што з кожным годам удасканальваюць прафесійнае майстэрства.

Мяне, напрыклад, парадавала, што нашы выхавальнікі выкарыстоўваюць у рабоце з дзецьмі нестандартныя прыёмы, што папаўняюць сваю прафесійную скарбонку шляхам самаадукацыі, шырокім перайманнем перадавога вопыту работы калег, у тым ліку і бліжняга замежжа. А яшчэ радуе тое, што сярод вопытных педагогаў у конкурсе прынялі ўдзел два маладыя спецыялісты — энергічныя, камунікабельныя, творчыя, здольныя. Яны не разгубіліся перад сваімі старэйшымі калегамі і паказалі ў гэтым добрым саперніцтве проста клас.

А ўвогуле конкурс пацвердзіў, што на Ганцаўшчыне ў сферы адукацыі працуе нямала цудоўных спецыялістаў, і дзеткі нашы — у надзейных руках дарослых.

Людміла САРОКА,

галоўны спецыяліст аддзела адукацыі, спорту і турызму

райвыканкама.

Фота Алы ПЯТЛІЦКАЙ.