На дабро — дабром, а на зло?..

Калі чалавека бачыш упершыню, то бывае цяжка разабрацца, з кім маеш справу. Зробіш яму дабро, а ў адказ… Калі б на дабро людзі заўсёды адказвалі тым жа, то свет быў бы іншым.

Успамінаецца выпадак, які здарыўся пад Ганцавічамі ў 2007 годзе. Вечарам ехала жанчына на машыне дамоў. Да вёскі заставаўся нейкі кіламетр, калі на абочыне падняў руку падлетак. Жанчына прытармазіла, і хлопец сеў у аўтамабіль. Толькі ад’ехалі, як пасажыр дастаў малаток і пачаў біць жанчыну па галаве. Праламаны чэрап — “падзяка” за дабрыню.

А ўвогуле, што такое дабро? Калі ты выконваеш кожную просьбу чалавека — ты добры? Сто разоў дагадзіў, а адзін — не, і ты ўжо можаш стаць ворагам.

Наш чалавек прывык да “моцнай рукі”, а калі ты з ім па-добраму, то ён часта ўспрымае гэта як слабасць і гатовы сесці табе на галаву.

Знаёмы начальнік будаўніча-мантажнага ўчастка неяк паскардзіўся: “Калі нам выдзелілі адну кватэру, то я настаяў, каб яе далі рабочаму, у якога двое дзяцей, стаж вялікі і які спецыялістам быў добрым. Аднойчы неабходна было тэрмінова здаць аб’ект, і я папрасіў, каб рабочыя выйшлі на працу ў выхадныя. Ніхто не адмовіўся, а той, каму далі кватэру, абурыўся: “А што, у нядзелю ў мяне ўжо не выхадны?”. Вось я і думаю: “А на якое ліха я для яго стараўся?”.

Атрымліваецца, калі ты робіш дабро, то не чакай, што табе адкажуць тым жа. Ва ўсялякім выпадку, не будзеш дужа расчараваны.

“Калі цябе ўдарылі па правай шчацэ, то падстаў левую”, — хрысціянскі запавет у філасофскім плане можа і заслугоўвае ўвагі, але ў жыцці нават самы веруючы чалавек, атрымаўшы аплявуху, спяшаецца ў міліцыю.

Кожны раз, калі бачу на абочыне пустыннай аўтамагістралі мужчыну з паднятай рукой, то цісну на газ. Я не ўпэўнена, што мая дабрата не абернецца для мяне бядой.

Такіх выпадкаў, як і той, што здарыўся пад Ганцавічамі, хапае, і часам яны заканчваюцца трагічна. Так што за дабро можна заплаціць жыццём. Але нельга жыць, ад усіх адгарадзіўшыся. Дастаткова заняць выразную пазіцыю. Калі чалавек падвёў, падмануў ці зрабіў шкоду, то за лепшае з ім не мець справы. Ён не вораг, але і не сябра. Як у такім разе рэагаваць на зло?

У Канфуцыя ёсць выдатны афарызм, які для мяне стаў адной з дзвюх запаведзей: “На дабро адказвай дабром, а на зло — па справядлівасці”.

Таццяна ІЛЬІНА.