Выбары ў мясцовыя Саветы дэпутатаў пройдуць 23 сакавіка 2014 года

Выбары ў мясцовыя Саветы дэпутатаў Беларусі дваццаць сёмага склікання назначаны на 23 сакавіка 2014 года. Адпаведны Указ № 557 Прэзідэнт Рэспублікі Беларусь Аляксандр Лукашэнка падпісаў 16 снежня.

Фінансаванне выбарчай кампаніі будзе ажыццяўляцца за кошт сродкаў рэспубліканскага бюджэту. На падрыхтоўку і правядзенне мясцовых выбараў у Беларусі плануецца патраціць 100 млрд. рублёў.

Па выніках пасяджэння старшыня ЦВК Лідзія Ярмошына паведаміла, што амаль 70 працэнтаў расходаў выбарчай кампаніі складаюць расходы на выплату ўзнагароджання членам выбарчых камісій. Усяго ў Беларусі толькі ў выбарчых камісіях будуць заняты амаль 80 тыс. чалавек. Друкарскія расходы, расходы на бензін, транспарт складуць каля 30 працэнтаў. Іх прадугледжана па мінімуму.

У гэтым годзе выбаршчыкі змогуць галасаваць толькі па месцы рэгістрацыі, пастаяннай або часовай. Гэта дасць магчымасць прадухіліць двайное галасаванне.

Яшчэ адно новаўвядзенне — інстытут абавязковай акрэдытацыі для нацыянальных наглядальнікаў на выбарах. Цяпер мясцовых наглядальнікаў можна будзе пазбавіць акрэдытацыі да завяршэння выбарчай кампаніі.

Кіраўнік Цэнтрвыбаркама закранула некаторыя новаўвядзенні, якія чакаюць кандыдатаў у дэпутаты на этапе падачы звестак для рэгістрацыі. Кандыдаты будуць абавязаны паведамляць аб усіх крымінальных судзімасцях, нават калі яны былі пагашаны або зняты. Акрамя таго, тыя, у каго няма афіцыйных крыніц даходу, будуць пазначаць у дэкларацыі аб даходах і маёмасці крыніцу, за кошт якой яны існуюць.

Участкі для галасавання будуць створаны не пазней за 21 студзеня. Участковыя выбарчыя камісіі павінны быць створаны не пазней за 5 лютага. Сюды палітычныя партыі, іншыя грамадскія аб’яднанні, працоўныя калектывы, грамадзяне шляхам падачы заяў вылучаюць сваіх прадстаўнікоў не пазней за 2 лютага. Дакументы аб вылучэнні неабходна прадставіць у раённыя, гарадскія выканаўчыя камітэты, мясцовыя адміністрацыі.

Вылучэнне кандыдатаў у дэпутаты мясцовых Саветаў пройдзе з 12 студзеня па 10 лютага, пасля чаго тэрытарыяльныя і акруговыя выбарчыя камісіі з 11 па 20 лютага правядуць рэгістрацыю кандыдатаў. Перадвыбарная агітацыя стартуе з дня рэгістрацыі прэтэндэнтаў на дэпутацкі партфель і прадоўжыцца па 22 сакавіка. Акрамя таго, з дня рэгістрацыі кандыдаты ў дэпутаты або іх прадстаўнікі па фінансавых пытаннях могуць адкрываць спецыяльныя выбарчыя рахункі.

Датэрміновае галасаванне на выбарах у мясцовыя Саветы пройдзе з 18 па 22 сакавіка. Дзень выбараў назначаны на 23 сакавіка.

Звесткі аб выніках выбараў у мясцовыя Саветы дэпутатаў вобласці па кожным узроўні мясцовых Саветаў дэпутатаў, Мінскі гарадскі Савет дэпутатаў і складзе выбраных дэпутатаў будуць прадстаўлены ЦВК не пазней за 29 сакавіка.