Кіраўніцтва раёна сустрэлася з таленавітай моладдзю

Традыцыйная навагодняя сустрэча кіраўніцтва раёна з таленавітай моладдзю Ганцаўшчыны прайшла ў мінулую суботу ў СШ № 3 г. Ганцавічы.

Актавая зала ўстановы, дзе сабраліся юнакі і дзяўчаты, якія ў мінулым годзе дасягнулі значных поспехаў у вучобе, творчасці, спорце, іх настаўнікі і бацькі, была перапоўнена. І не дзіўна: таленавітых і здольных рабят у нашым раёне вельмі многа.

Спачатку з цёплымі словамі ўдзячнасці да маладых талентаў Ганцаўшчыны звярнуўся кіраўнік раёна Аляксандр Саланевіч. Ён выказаў захапленне тым, што на Ганцаўшчыне шмат таленавітых, адораных і перспектыўных рабят. Аляксандр Паўлавіч павіншаваў юнакоў і дзяўчат з навагоднімі і каляднымі святамі, а таксама пажадаў маладым і таленавітым не спыняцца на дасягнутым,  далей старанна вучыцца і імкнуцца да ўдасканалення. У сваю чаргу, рабяты ад усёй моладзі Ганцаўшчыны ўручылі кіраўніку раёна памятны сувенір.

Потым да прысутных звярнулася начальнік аддзела адукацыі, спорту і турызму райвыканкама Надзея Здрок. Яна таксама павіншавала ўсіх са святамі, коратка падвяла вынікі мінулага года і адзначыла лепшых вучняў і педагогаў раёна. Пасля свайго выступлення Надзея Уладзіміраўна атрымала ад вучняў Ганцаўшчыны сувенір, зроблены рукамі дзяцей.

Далей наступіла самая прыемная і доўгачаканая частка сустрэчы — узнагароджванне. Аляксандр Саланевіч уручыў каштоўныя падарункі пераможцам і прызёрам шматлікіх міжнародных і рэспубліканскіх алімпіяд, конкурсаў і спаборніцтваў — Яўгеніі Пракапчук, Дар’і Буйкевіч, Таццяне Блінкоўскай, Кацярыне Занька, Эдуарду Жагуню. Так, вучаніца СШ № 3 і ўдзельніца ўзорнага літаратурнага аб’яднання “Верасок” РЦДЮТ Яўгенія Пракапчук у мінулым годзе стала пераможцай міжнароднага конкурсу юнацкай паэзіі, а таксама пераможцай і прызёрам другога этапа рэспубліканскай алімпіяды па рускай мове і літаратуры і грамадазнаўстве. Астатнія рабяты станавіліся прызёрамі ў разнастайных спартыўных спаборніцтвах рэспубліканскага маштабу.

Для ўзнагароджвання на сцэну выходзілі таксама пераможцы і прызёры другога і трэцяга этапаў абласных і рэспубліканскіх алімпіяд, навукова-практычных канферэнцый, разнастайных конкурсаў і спартыўных спаборніцтваў. Яны атрымлівалі ўзнагароды з рук старшыні раённага Савета дэпутатаў Віктара Дразда, намесніка старшыні райвыканкама Сяргея Сарокава, начальніка аддзела адукацыі, спорту і турызму райвыканкама Надзеі Здрок, дырэктара РЦДЮТ Алены Ленкавец, загадчыка сектара спорту аддзела адукацыі, спорту і турызму райвыканкама Яўгена Кабрынца.

Пасля цырымоніі ўзнагароджвання ад імя моладзі Ганцаўшчыны выступіў вучань 11 “Б” класа СШ № 3 г. Ганцавічы Кірыл Апановіч. Ён падзяліўся ўражаннямі ад сустрэчы і падзякаваў кіраўніцтву раёна за падтрымку і дапамогу, якую яно аказвае маладым і таленавітым юнакам і дзяўчатам.

Хочаца верыць, што тыя рабяты, хто ў гэты дзень падняўся на сцэну і атрымаў заслужаныя апладысменты і ўзнагароды, у будучым дасягнуць поспехаў у сваёй любімай справе. Талент у гэтых рабят ёсць, застаецца толькі працаваць над сабой і надалей удасканальваць свае здольнасці.

Уладзімір САКАЛОЎ.