Ілжывы выклік? Заплаці!

Іншы раз супрацоўнікі міліцыі і ўстаноў аховы здароўя раёна сутыкаюцца з ілжывымі выклікамі. Паступае паведамленне, а потым высвятляецца, што чалавеку ніякая дапамога не патрэбна, а калі і патрэбна, дык гэта ніяк не датычыцца дзейнасці праваахоўных органаў ці медыцынскіх работнікаў.

Так, жыхар райцэнтра П. патэлефанаваў у аддзяленне хуткай дапамогі райбальніцы і паведаміў, што яму зусім кепска, а калі медыкі прыехалі, то аказалася, што гараджаніну стала проста сумна. А вось жыхарка вёскі Задуб’е М. паведаміла ў РАУС аб тым, што ў яе дома задушылі чалавека. На самай справе гэта аказалася фантазіяй жанчыны. Падмануў міліцыянераў і жыхар вёскі Чудзін С., які паспрачаўся з сябрамі, што выклікае міліцыю. Ён патэлефанаваў у райаддзел і паведаміў, што скандаліць з маці. Яшчэ адзін вясковец з Малькавіч не знайшоў нічога лепшага, як паведаміць у РАУС  аб тым, што забіў бацьку. Потым, па прыездзе супрацоўнікаў міліцыі, прасіў давезці яго да бальніцы, бо баліць нага…

Такія лжывыя выклікі не толькі перашкаджаюць работнікам выконваць іх службовыя абавязкі, але і прыводзяць да бессэнсоўнага расходавання бюджэтных сродкаў. Таму пракуратура Ганцавіцкага раёна сёлета падрыхтавала 11 іскавых заяў на пакрыццё страт, звязаных з мерамі рэагавання на лжывыя паведамленні, на агульную суму 2,2 мільёна рублёў. З іх 2 іскавыя заявы на 420 тысяч рублёў прыходзяцца на пакрыццё страт, панесеных медыкамі на рэагаванне па лжывых паведамленнях аб неабходнасці аказання медыцынскай дапамогі. Усе заявы разгледжаны ў судзе і па ўсіх вынесены рашэнні аб спагнанні затрат з асоб, ад якіх паступілі тыя лжывыя паведамленні.

Варта адзначыць, што ва ўсіх 11 выпадках асобы, ад якіх паступілі лжывыя паведамленні, знаходзіліся ў стане алкагольнага ап’янення.

Аляксей ГРУШЭВІЧ.