Настаўнік года

Фінал раённага этапа 21-га рэспубліканскага конкурсу “Настаўнік года” прайшоў у мінулую суботу, 14 снежня, у сярэдняй школе № 3 г. Ганцавічы.

Асаблівасцю сёлетняга конкурсу стала ўвядзенне прадметных намінацый, і яго пераможцамі сталі адразу 6 педагогаў раёна. Гэта зроблена для таго, каб удасканаліць прафесійнае ўменне педагогаў у галіне тэорыі і методыкі выкладання вучэбнага прадмета і для развіцця прадметных методык на аснове абагульнення дасягненняў педагогаў-практыкаў. Зразумела, што методыка выкладання кожнага вучэбнага прадмета мае свае асаблівасці і дзякуючы такім змяненням у конкурсе педагогі змогуць пераняць вопыт у лепшых па прафесіі.

Спачатку быў праведзены завочны этап, у якім кожны ўдзельнік пісьмова рабіў самапрадстаўленне педагагічнага вопыту, а таксама дэманстраваўся яго відэаўрок. Другі этап праходзіў у два туры: канкурсанты давалі ўрок у незнаёмым класе і праходзілі псіхалагічна-педагагічнае тэсціраванне. У выніку былі вызначаны пераможцы ў кожнай з шасці намінацый, якія ў фінале і трымалі справаздачу. Яны падышлі да гэтага творча, і падтрымамі іх калегі і вучні.

У намінацыі “Фізіка, астраномія, матэматыка, інфарматыка” пераможцам стаў настаўнік фізікі Хатыніцкай сярэдняй школы Дзмітрый Станіслававіч Бондар. У намінацыі “Замежная мова” — настаўнік англійскай мовы гімназіі г. Ганцавічы Алена Яўгенаўна Дайлід. У намінацыі “Руская мова і літаратура, беларуская мова і літаратура” — настаўнік беларускай мовы і літаратуры Востраўскага дзіцячага сада — сярэдняй школы імя Міхася Рудкоўскага Валянціна Мікалаеўна Хваль. У намінацыі “Пачатковыя класы” — настаўнік пачатковых класаў СШ № 1 г. Ганцавічы Ларыса Сяргееўна Ільюкевіч. У намінацыі “Музыка, выяўленчае мастацтва, працоўнае навучанне, чарчэнне, фізічная культура і здароўе, дапрызыўная падрыхтоўка” — настаўнік фізічнай культуры і здароўя Востраўскага дзіцячага сада — сярэдняй школы імя Міхася Рудкоўскага Міхаіл Іванавіч Вадап’ян. І ў намінацыі “Гісторыя, грамадазнаўства, геаграфія, хімія, біялогія” мацнейшай стала настаўнік гісторыі СШ № 3 г. Ганцавічы Наталля Міхайлаўна Паплаўская.

Дарэчы, існуе яшчэ і сёмая намінацыя — “Выхавальнік дашкольнай адукацыі”. Лепшы педагог у ёй будзе вызначаны ў студзені 2014 года і разам з вышэйзгаданымі калегамі будзе прадстаўляць Ганцаўшчыну на абласным узроўні.

Аляксей ГРУШЭВІЧ.

 На здымку: пераможцы раённага этапа рэспубліканскага конкурсу “Настаўнік года”.

Фота з архіва аддзела адукацыі, спорту і турызму райвыканкама.