“Сюрпрыз” для браканьераў

У адпаведнасці з Указам Прэзідэнта Рэспублікі Беларусь ад 5 снежня 2013 года № 551, уступаюць у дзеянне (праз шэсць месяцаў пасля надрукавання) у новай рэдакцыі Правілы  вядзення паляўнічай гаспадаркі і палявання, рыбалоўнай гаспадаркі і рыбалоўства.

Па новых правілах кожны, хто хоча атрымаць пасведчанне на права палявання,  павінен прайсці  курс навучання і толькі з дакументам, які сведчыць пра набыццё тэарэтычных і практычных навыкаў, можа быць дапушчаны да экзаменаў.

Веснавое паляванне на вадаплаўную птушку па-ранейшаму не будзе забаронена, і яно не можа працягвацца больш за 28 каляндарных дзён.

Што датычыцца бакланаў і шэрай чаплі, то хоць у правілах і знікла паняцце “непажаданыя віды жывёл”, але адстрэл іх не забаронены. Паляваць на бакланаў і чапляў можна на сажалках  рыбалоўных гаспадарак, што шырока практыкавалася і раней.

Сезон палявання падчас гону на лася і аленя пачынаецца з 20 жніўня, а раней ён наступаў з 1 верасня.

Загоннае паляванне на капытных павялічана на адзін дзень — да 31 снежня. Можна, як бачым, з палявання ды за навагодні стол.

Паляванне на выдру, бабра, амерыканскую норку і андатру заканчваецца 31 сакавіка.

Веснавы сезон на качак і гусей  можа працягвацца 28 каляндарных  дзён, а пачынаецца ён у тэрмін, устаноўлены рашэннем карыстальніка паляўнічых угоддзяў. Цецерукоў і глушцоў вясной можна будзе страляць да 10 мая. Раней сезон заканчваўся 30 сакавіка.

Адносна веснавой забароны на лоўлю рыбы, то яе тэрміны будуць залежаць ад нерасту, а гэта звязана  з прагрэвам вады ў вадаёмах. У сувязі з гэтым у паўднёвых рэгіёнах краіны забарона ўступіць раней, чым у паўночных.

Яшчэ больш жорсткае пакаранне чакае браканьераў. Напрыклад, за незаконны адстрэл лася давядзецца заплаціць не 95 базавых велічынь, а 300. Удвая вырасла сума за забітага дзіка ці казулю — з 60 базавых да 120. А хто незаконна здабудзе цецерука, таму давядзецца заплаціць 60 базавых велічынь, што ў шэсць разоў болей, чым было раней.

Несумленных рыбаловаў таксама чакае  суровае пакаранне. У сярэднім сума выплат за браканьерства тут вырасла ў тры разы.

Варта яшчэ дадаць, што Міністэрства лясной гаспадаркі заканчвае распрацоўку сістэмы, якая дасць магчымасць набываць паляўнічую пуцёўку праз інтэрнэт.

Уладзіслаў Снітка.

(Артыкул падрыхтаваны падчас анлайн-канферэнцыі на сайце БелТА).